Santiago 1

1

2

3

4

5

¹Siyak si Santiago, sokkad no uripon to Monama woy tod Longaggon ta no si Disas Krays. Id sulat a koniyu no duma ku no mgo Judio nod pompomakoy no nokodsuwoysuwoy ka-ay to ampow't ingod. Momonnu kowd duwon?

²Mgo suwod ku riyon to kopomakoy, ahad duwon nokod-osso-osson kosupittan nod inguma koniyu, yo kow'd kotompoddi to puhawang, ko konna, kahaa-i row idda oraroy.

³Oyyos nokosaddoo kowd no iddos kodgeddam no no-ukitan dow, idda en kos od pokomosalig to koniyun kopomakoy amoy'd pokoti-is kow tadda.

⁴De-en ponayun kow kos ti-is to ahad ondan no kosupittan amoy'd buyyag kow riyot kopomakoy no waa kulang.

⁵Iddos ahad ondoy koniyu no kulang kos moraom no koovottan, iyon moppiya nod buyu sikandin diyot Monama no movoggoyvoggoy, woy dii en sikandin od koohoddan taddot od buyu kandin.

⁶Piru otid buyu sikandin diyot Monama, ko-ilangan no dii sikandin od duworuwa. Su iddos minuvu nod duworuwa, od poko-iling to baud to dahat no od piyoddon to monokkaan kaamag ahad ingkon.

⁷De-en iddos iling ka-ay'n minuvu, konna sikandin od poko-imman nod kotanggap din iddos od buyuwon din diyon tod Longaggon.

⁸Oyyos id duworuwa man sikandin to kodsalig diyon to Monama, woy dii mandad od koto-oo iddos langun nod puungan din.

⁹Na, sikiyu no mgo suwod diyot kopomakoy no worowora, kahaa kow, su mowwet kow riyot kod-ontong to Monama.

¹⁰Woy sikiyu nod koruwonnan, kahaa kow otid kosorollan dow no iddos koniyun korotuwan, waa koru-anon diyot kod-ontong to Monama, oyyos od poko-iling idda to kovukaran no go-os od kahangu.

¹¹Su otid moohiting don kos allow, od kaanos kos mgo sabbot woy'd pongo-umpad kos mgo kovukaran, woy od ka-awa ron kos kogolingoy tadda. Iling en mandad tadda kos minuvu nod koruwonnan, su laggun tod kosasow sikandin to mgo korotuwan din, tigkow od inguma kandin kos kopotayan.

¹²Na, moppiya kod kotomanan taddot minuvu nod pokoti-is to mgo kodgeddam. Oyya su otid pokoti-is sikandin tadda, od kotanggap din iddos ganti, no idda en so umuun waad tomanon no id tandu to Monama atag to langun nid ginawa kandin.

¹³Otik duwon minuvu no nopiyod diyot kodpuung to saa, konna en ollog nod ikahi sikandin, no iddos Monama kos id piyod kandin to kodpuung to saa. Oyyos konna en od kopiyod kos Monama riyot kodpuung to kororattan, woy konna mandad sikandin kos od piyod to ahad ondoy riyot kodpuung to saa.

¹⁴Su iyon od pokopiyod to minuvu nod puung to saa, idda en so morat no ingowollon din, no iling to oppan nod pokoposahad kandin.

¹⁵Su otid duurumannan din iddos morat no ingowollon, iyon od ingumannon tadda, iddos saa. Woy dos ponayun nod puung to saa, iyon od ingumannon tadda, iddos kopotayan no waad tomanon.

¹⁶De-en id ginowannan ku no mgo suwod, yo kow'd pa-akaa to poomdom dow no Monama kos od piyod koniyu riyot kodpuung to saa.

¹⁷Oyya su iddos langun no moppiya woy waa kulang nod kotanggap ta, id pomon diyot Monama no mid bovaa to langun nod ponse-aa riyot datas to langit. Ahad od kopalin iddos od ponse-aa riyot langit, dii en od kopalin kos Monama.

¹⁸Oyyos pomon to kandin nid kopi-i, novovallan ki no mgo anak din ukit to kodpaabbotlabbot keta taddot bonnaan nonaw. Id puungan din ini, amoy siketa kos lampas kos koru-anon to langun no binovallan din.

¹⁹Na id ginowannan ku no mgo suwod, poomdomma row ini. Ko-ilangan nod kotuig kow od pominog, konnod awang od ooseng woy konna moomok od langot.

²⁰Su iddos langot, konna od undag to motallong no ko-ubpa no id kopi-it Monama.

²¹De-en tonani row iddos langun nod pokolibmit woy morat no pinuungan dow. Poobbava kow riyot Monama, woy tumana row iddos kahi rin no nokopomuwa riyot pusung dow, su idda en kos od pokotobbus koniyu.

²²Yo row okali kos koniyun ko-ugolingun ukit to kodpominog da to kahit Monama, ko konna, tumana row idda.

²³Oyya su iddos ahad ondoy nod pominog to kahit Monama woy diid tuman tadda, noko-iling sikandin taddot minuvu no id ontong diyot oungan.

²⁴To nokita rin kos ko-ugolingun din, id ipanow sikandin woy idda ron en, nolingawan din don kos boyo rin.

²⁵Piru iddos minuvu nod pominog to suhu to Monama, no idda en kos od pokopolegguang kandin pomon diyot saa woy dii rin idda od kolingawan, ko konna, od tumanon din, od tovangan en sikandin to Monama taddot langun nod puungan din.

²⁶Na, otik duwon minuvu nod ikahi no mopompomakoy sikandin, piru dii rin od kotoholan kos bivig din, id okalan din kos ko-ugolingun din woy waa en koru-anon to kandin no kopomakoy.

²⁷Piru iddos mooggot no kopomakoy no waa id pokosawoy riyot kod-ontong to Monamon Amoy ta, idda en so kodtavang to mgo ilu woy mgo bau nod kohirapan, woy dii mandad sikandin od kopiyod to morat no botasan to mgo minuvu no waa Monama.