12 naxanye sariɲan e yɛtɛ yɛɛ ra yi anu, e xɔsin mi baxi e ma
13 naxanye yɛɛ rawaso e muxune matoma yɛtɛ yigboni,
14 naxanye ɲinne luxi alo silanfanne e gbɛgbɛne maxɔlɔn tima alo filɛne, alogo e xa yiigelitɔne raxɔri bɔxɔn fari e tɔrɔ muxune ɲan adamadiine yɛ.
15 Dii firin yi nusun yii naxanye yi a falama tun, e naxa, “N ki! N ki!” Se saxan nan na naxanye mi wasama mumɛ, han se naanin naxanye mi a falɛ, e naxa, “Na lan.”
16 E tan ni i ra: Laxira nun gbantan nun bɔxɔn naxan mi wasama igen na, e nun tɛɛn naxan mi a falan mumɛ, a naxa, “Na lan.”
17 Muxun naxan yɛɛ yoma a baba ma, naxan tondima a nga xuiin suxɛ, xude xɔn xaxane a yɛɛne gema nɛn a kui, dugane yi e don.
18 Se saxan na naxanye dangu n na, han naanin n mi naxanye famuxi.
19 E tan ni i ra: Singbinna kirana kore, saɲina kirana gɛmɛn fari, kunkina kirana fɔxɔ igen xun ma, e nun banxulanna kirana sungutunna konni.
20 Ɲaxalan yalunden kɛɲaan ni ito ra: A na a dɛge, a a dɛɛn nasugusugu, a yi a fala, a naxa, “N mi sese ligaxi a ɲaxin na.”
21 Bɔxɔn xuruxurunma se saxan bun, han naanin a mi tiyɛ naxan bun.
22 E tan ni i ra: Konyin na findi mangan na, kɔmɔn na lugo donseen na,
23 ɲaxalan naɲaxuxin na futu, e nun konyi gilɛn na a kanna kɛɛn tongo.
24 Sube naanin xurun bɔxɔn ma koni e tan nan fekolonna sɔtɔxi:
25 Dondonle fanga mi na, koni e e donseen namarama a waxatini.
26 Fanye ra siine sɛnbɛ mi na, koni e sodene rafalaxi gɛmɛne nin.
27 Manga mi tuguminne xun na, koni e birin minima e gali yɛ ma.
