8 Naxan na dahamu gbeti donla tɔnɔ gbeene xɔn na a malanma muxu gbɛtɛn nan xa naxan hinanma sɛnbɛtarene ra.
9 Xa muxuna nde a tunla ba sariyan na alogo a nama a mɛ, hali a na sali, na yɛtɛɛn haramuxi.
10 Naxan na muxu faɲine xali kira ɲaxin xɔn, na biran yinla nan na a naxan gexi. Koni fɛ mi naxan na, na hɛrin nan sɔtɔma a kɛɛn na.
11 Nafulu kanna a mirixi nɛn a fe kolon, koni yiigelitɔ xaxilimana a kɛɲaan nakɔrɔsima nɛn.
12 Tinxin muxune na nɔɔn sɔtɔ, binye gbeen na a ra, koni xa muxu ɲaxine keli, birin a luxunma nɛn.
13 Naxan na a hakɛne luxun, na mi hɛrin sɔtɔma. Koni naxan na a ti e ra, a xɛtɛ e fɔxɔ ra Ala kininkininma na ma nɛn.
14 Sɛwan na kanna xa naxan gaxun Ala yɛɛ ra, koni naxan na a bɔɲɛni xɔdɔxɔ na birama tɔrɔni.
15 Yatan naxan wurundunma e nun kanko gbeen naxan fɔnma muxun ma, na luxi nɛn alo muxu ɲaxina yama sɛnbɛtaren xun na.
16 Manga xaxilitaren tinxintare wanle wuya. Koni hɛrisigɛn naxan sɔtɔxi wulen xɔn, na raɲaxu naxan ma, na siimayaan xunkuyama ayi nɛn.
17 Faxa ti goronna muxun naxan xun ma, na a gima nɛn han a sa a gaburun li. Muxu yo nama a rati!
18 Naxan na sigan ti fɛtareyani, na kisima nɛn. Koni naxan na tinxintareyaan liga, a kira firinna suxu na birama nɛn na nde kedenna xɔn.
19 Naxan na a bɔxɔn nawali, na lugoma nɛn. Koni naxan na bira fe fuune fɔxɔ ra, na wasama yiigelitɔyaan nan na.
20 Lannaya muxun wasaxi barakan nan na. Koni naxan kunfaxi bannayaan xɔn, na saranma nɛn na feen na.
21 A mi lan i muxune rafisa e bode xa, anu, muxun hakɛn sɔtɔma buru dungin xɔn.
22 Naxan kuma, na kunfaxi bannayaan nan xɔn, a mi a kolon a tɔrɔn nan fama a ma.
23 Naxan na muxun sɔnna fala a xa, na rafanma nɛn na kanna ma nɛn dɔnxɛn na dangu muxun na naxan a matɔxɔma wuleni.
