14 Finmaseen na so muxun yii wundoni na xɔlɔn maxunbelima nɛn. Muxun na dimi bun seen ba suturani, na xɔlɔ gbeen nan ɲanma.
15 Sɛwan na a ra tinxin muxun xa, kiti kɛndɛn na sa. Koni gbalon na a ra fe ɲaxi rabane xa.
16 Naxan na keli xaxilimayaan kiraan xɔn, na sa a matabun faxa muxune nan yɛ.
17 Mananmanantɔɔn setareyaan kolonma nɛn. Naxan na lu dɔlɔn nun ɲaxunna fɔxɔ ra, na mi findɛ nafulu kanna ra mumɛ!
18 Muxu ɲaxin nun yanfantenna gbalon nan sɔtɔma, tinxin muxun nun muxu faɲine yi xunba na ma.
19 A fisa i dɔxɔ tonbonni, benun ɛ nun ɲaxalan yɛngɛ gidin xɔlɔxin xa dɔxɔ.
20 Nafulu kɛndɛn nun ture faɲin namaraxi fekolonne konne yi, koni xaxilitarena a gbeene birin donma nɛn.
21 Naxan na bira tinxinyaan nun hinanna fɔxɔ ra, na siimayaan nun tinxinna nun binyen sɔtɔma nɛn.
22 Fekolonne nɔɛ kurugbane taan tongɛ nɛn, e yi e taan nabilinna yinna kala, e yigi saxi naxan yi.
23 Naxan na a dɛɛn nun a falan suxu, na a niin nakantanma gbalon nan ma.
24 Feene birin magele wasode yɛtɛ yigboon yii. A feen birin ligama yanda gbeen nin.
25 Muxu narixine waxɔn feene nan e faxama, amasɔtɔ e tondima walɛ.
26 E kunfaxi e waxɔn seene xɔn waxatin birin, koni tinxin muxune kiin tiin fonisireyaan nin.
27 Se haramuxin nan muxu ɲaxine saraxane ra. E na a ba bun kobina nde ma, e ɲaxu dangu na ra.
