1Lu zra na' bdxuaj Jesús xu'u, na' xeajdxé'e̱ dxu'a nísadau'.
2Na' lawe' da belezraga benne' zante̱ naga zua Jesús, guxú'e̱ tu lu da dxedá lawe' nísadau', ne gudxé'e̱ na'. Xúgute̱ benne' ca' belexegá'ane̱' dxu'a nísadau' na'.
3Nadxa bse̱de Jesús benne' ca' da zante̱ da bchálaje̱', dxenné̱': ―Tu benne' dxaza guzé̱'e̱ zíaje̱' guza.
4Dxácate̱ dxaze̱', bal-la bínnedu ca' xeajlechaze na dxu'a neza. Na' belelá' bxínnedu ca', guláguba' bínnedu ca'.
5Bal-la bínnedu ca' xeajlechaze na lu xiaj naga quebe dxé'teca xu. Bínnedu caní chadí gulezría na lawe' da quebe dxé'teca xu.
6Gate bla' gubizra, na' gulecuade na. Lawe' da quebe dxé'teca xu, na' gulebizre na.
7Bal-la bínnedu ca' xeajlechaze na naga bezríale̱'e̱ lba xeche', na' lba xeche' ca' belegula na, ne blule na da du ca' naze̱'.
8Bal-la bínnedu ca' xeajlechaze na lu xu be̱be, na' belúnnale̱'e̱ na. Bal-la xágadu ca' belunna na tu gaxúa tu tu na, na' xebal-la na belunna na ga xun tu tu na, na' xebal-la na belunna na chi dxua tu tu na.
9Che zua nágale, le xene.
10Nadxa benne' ca' dxuse̱de Jesús gulebigue̱' naga zue̱' Le̱', ne buluche̱be̱' Le̱': ―¿Bizr chee̱ na' dxuchálajle̱nu' benne' ca' da dxululé'e na?
11Beche̱be Jesús, dxenné̱': ―Dios dxunne̱' lataj nézele le'e da nagache ca dxenná bea Le̱' xabáa, san benne' caní quebe dxu'e̱ lataj.
12Benne' nape̱' late', Dios gunézrujdxe̱' le̱', na' gápale̱'e̱, san benne' quebe bi nape̱', Dios wequé̱'e̱ ca da du nape̱'.
13Chee̱ le̱ na' dxuchálajle̱na' benne' caní da dxululé'e na, lawe' da cate' dxelenné̱'e̱ quebe dxelelé'ene̱'. Cate' dxelenne̱' quebe dxeléajni'ine̱'.
14Ca naca da dxaca chee̱ benne' caní dxaca na ca gunná Isaías, bénnea' bchálaje̱' waláz chee̱ Dios, gunné̱': Da li wenle. Cate' dxenle quebe dxéajni'ile. Da li wanná'le. Cate' dxenna'le quebe dxelé'ele.
15Caní naca na lawe' da zaj naca lázrdau zide' benne' caní. Quebe dxelaca lazre̱' xelenne̱'. Dxulugácue̱' xiaj lawe̱' chee̱ quebe xelelé'ene̱'. Quebe dxelenne̱', na' quebe dxeléajni'ine̱'. Quebe dxelexílaje̱' neda' chee̱ xexuna' le̱'.
16’Ba neza zrente̱ naca na chee̱le le'e lawe' da dxelé'ele nen xiaj laule, ne dxenle nen nágale.
17Da li dxapa' le'e, benne' zante̱, benne' ca' buluchálaje̱' waláz chee̱ Dios, ne benne' xrlátaje ca' gulaca lazre̱' xelelé'ene̱' da caní dxelé'ele le'e. Quebe belelé'ene̱' na. Gulaca lazre̱' xelenne̱' da caní dxénnele le'e. Quebe belenne̱' na.
18Na' gunná Jesús: ―Le xenne ca zéaje̱ da naca chee̱ benne' dxaza nigá.
19Benne' dxelenne̱' ca naca chee̱ Bénnea' dxenná be'e̱ xabáa, ne quebe dxeléajni'ine̱' zaj naque̱' ca bínnedu ca' xeajlechaze na dxu'a neza. Za da xriwe̱' ne dxugúa na ca naca dizra' da ba gulezí'e̱ lu xichaj lázrdawe̱'.
20Ca naca chee̱ bínnedu ca' xeajlechaze na lu xiaj, da caní dxululé'e na ca naca chee̱ benne' ca' dxelezi'e̱ dizra' na' du lazre̱'.
21Ca na' guca chee̱ bínnedu ca', quebe guca xuludé lue na, ne quebe guzí bea na, ca'an dxaca chee̱ benne' caní, gate na' bi da dxelezaque̱', u che nu zeajnáu zi' xuzre̱' le̱' lawe' da zaj nazi'e̱ dizra' nigá, na' dxelexebigue̱'.
22Bínnedu ca' xeajlechaze na ládujla xeche' dxululé'e na ca naca chee̱ benne' dxelenne̱' dizra' nigá, san dxelebé'le̱'e̱ gunne xue da naca chee̱ xe̱zr la xu nigá, na' ca naca xel-la' gunní'a dxezí xe̱ na benne' ca'. Xúgute̱ da caní dxuluzaga na dizra' nigá, na' quebe dxun na da dxal-la' gun dizra' nigá lu xichaj lázrdawe̱'.
23Ca naca chee̱ bínnedu ca' da xeajlechaze na lu xu be̱be, da caní dxululé'e na ca naca chee̱ benne' ca' dxelenne̱' dizra' nigá, ne dxeléajni'ine̱' na, na' zaj naque̱' ca bínnedu ca' belúnnale̱'e̱ na. Bal-la benne' zaj naque̱' ca bínnedu ca' belunna na tu gaxúa tu tu na, na' xebal-le̱' zaj naque̱' ca bínnedu ca' belunna na ga xun tu tu na, na' xebal-le̱' zaj naque̱' ca bínnedu ca' belunna na chi dxua tu tu na.
24Nadxa bchalaj Jesús xetú da dxulé'e na, dxenné̱': ―Ca dxaca ga ni dxenná bea Dios naca na ca da guca gate tu benne' guze̱' binne cháwe'dau' lu xe̱zr la xu chee̱'.
25Gate dxelase xúgute̱', na' bzrin tu benne' dxezré̱'e̱ le̱', ne xeajaze̱' binne xixre' zrinnaj láwela zrua' xtila, na' bezé̱'e̱.
26Gate na' bgula xel-la' zrua' xtila, ne bla' dau chee̱ na, cá'anqueze bla' xixre' zrinnaj ca'.
27Nadxa benne' we̱n zrin ca' xeajlegue̱zre̱' xrane na, dxelé̱'e̱ le̱': “Xran, guzu' binne cháwe'dau' lu xe̱zr la xu chiu'. ¿Gazra guzá xixre' zrinnaj caní?”
28Gunná xránabe': “Tu benne' dxezré̱'e̱ neda' be̱ne̱' da nigá.” Nadxa benne' we̱n zrin ca' buluche̱be̱' le̱': “¿Dxaca lazru' chéajntu' cheajlé̱pentu' xixre' zrinnaj ca'?”
29Le̱' guzre̱' we̱n zrin ca': “Quebe gaca na. Gate na' lázrule xixre' zrinnaj ca', walázrute̱le xel-la' zrua' xtila.
30Xelegúladxa na cháwe'la tu zren ca xecá'adxadxu zrua' xtila. Nadxa nna be'eda' benne' we̱n zrin ca' xelequé̱'e̱ nedxu xixre' zrinnaj ca', na' xuluchéaje̱' xelune̱' tu xrúnujdu weaj chee̱ guzézxedxu na. Nadxa xelelape̱' zrua' xtila na', ne xezrá chawe' na lizra'.”
31Nadxa bchalaj Jesús xetú da dxulé'e na, dxenné̱': ―Da dxaca chee̱ benne' dxelezí' lu ne̱'e̱ nna be'e Dios le̱' naca na ca da guca gate tu benne' guze̱' binne mostaza lu xe̱zr la xu chee̱'.
32Da li binne mostaza nigá naca na da bízrujdxa lawe' xúgute̱ binne ca'. Gate ba nagula na naca na tu xaga zrendxa lawe' xúgute̱ xixre' cuan. Dxaca na ca tu xaga zren naga dxelezeque' cheajlezría bxínnedu ca' xrú'uneba' lu zruze na.
33Nadxa bchalaj Jesús xetú da dxulé'e na, dxenné̱': ―Da dxaca chee̱ benne' dxelezí' lu ne̱'e̱ nna be'e Dios le̱' naca na ca da guca gate tu nu'ula bchixre cua zichaj chee̱ xeta xtila lawe' chunna xaga cua zrua' xtila, na' dute̱ na guxasa na bliche.
34Xúgute̱ da caní bchálajle̱ Jesús benne' ca', dxuchálaje̱' da dxululé'e na, na' quebe bchálajle̱ne̱' benne' ca' che quebe bchálaje̱' da dxululé'e na.
35Caní guca ca da gunná benne' bchálaje̱' waláz chee̱ Dios, gunné̱': Guchálaja' ca naca da dxulé'e na da guchálaja'. Gulé'eda' ca naca da nagache gate guzrete̱ xe̱zr la xu.
36Nadxa Jesús bze̱' benne' ca' dizra', na' guxú'e̱ lu xu'u. Benne' ca' dxuse̱de Jesús gulebigue̱' lau Le̱', na' gulé̱'e̱ Le̱': ―Bzéajni'i netu' da dxulé'e na ca naca chee̱ xixre' zrinnaj da dxenná'queze na ca dxenná' xel-la' zrua' xtila.
37Nadxa Jesús guzre̱' benne' ca': ―Bénnea' dxaze̱' binne cháwe'dau' nigá naque̱' Benne' Gulje̱' Bénneache.
38Naga dxaze̱' binne nigá naca na lu xichaj lázrdau bénneache. Binne cháwe'du ca' zaj naca benne' ca' dxenná be'e Dios, na' xixre' zrinnaj ca' zaj naca na benne' ca' zaj naque̱' chee̱ da xriwe̱'.
39Bénnea' dxezré̱'e̱ xrane xe̱zr la xu na', ne xeajaze̱' xixre' zrinnaj naque̱' da xriwe̱' ná'queze. Zra xelelape̱' naca na zra bze̱be chee̱ xe̱zr la xu nigá, na' benne' ca' xelelape̱' zrua' xtila na' zaj naque̱' gubáz chee̱ xabáa chee̱ Dios.
40Ca belexequé̱'e̱ xixre' zrinnaj ca', ne buluzré̱'e̱ na lu xi' chee̱ xelezxe na, ca'an gácaqueze lu zra bze̱be na'.
41Neda', Benne' Gulje̱' Bénneache, sel-la' gubáz chee̱ xabáa chia' ca' chee̱ xulucuase̱' naga nna be'a xúgute̱ benne' ca' dxuluxrínnajte̱' benne' xula, ne benne' ca' dxelune̱' da cale̱la.
42Nadxa gubáz chee̱ xabáa ca' xuluzré̱'e̱ benne' ca' dxelune̱' da cale̱la lu xi' gabila naga xelebezre̱', ne xeláguxa'ate̱ lazxe̱'.
43Nadxa benne' ca' dxelune̱' da xrlátaje ca da dxenná be'e Dios xelácaqueze̱' ca gubizra naga dxenná bea Dios, Xra benne' ca'. Che le'e zua nágale, le xene.
44Na' gunná Jesús: ―Naga dxenná bea Dios naca na ca tu xel-la' gunní'a da nagache na tu lu xe̱zr la xu. Tu benne' bezrélene̱' xel-la' gunní'a nigá, na' bucache̱' na. Ne zúale̱'e̱ xel-la' dxebé zexíaje̱' xeajxé̱tie̱' xúgute̱ da nape̱', na' bezi'e̱ xe̱zr la xu na'.
45Na' gunná Jesús: ―Naga dxenná bea Dios naca na ca tu da dxexilaj tu benne' we̱te, dxexílaje̱' bga ca' da zaj zaca na.
46Gate dxezrélene̱' tu da zácale̱'e̱, na' zexíaje̱' zeajxé̱tie̱' xúgute̱ da nape̱', na' si'e̱ bga na'.
47Na' gunná Jesús: ―Ca naca chee̱ benne' ca' xelexú'e̱ naga dxenná bea Dios, naca na ca tu xixruj bela, da dxuluzale̱' lu nísadau', na' dxelezene̱' zane' cue' bela.
48Gate dxezrá xixruj na', na' benne' ca' dxelezene̱' bela dxelexequé̱'e̱ na dxu'a nísadau', na' dxelebé'e̱ dxelexebée̱' bela ca'. Bela chawe' ca' dxuluxuzré̱'e̱-ba' lu xcuite, na' bela xala ca' dxeledxú'une̱'-ba'.
49Ca'an gaca lu zra bze̱be na'. Xeledxúaj gubáz chee̱ xabáa ca', xelexebéaje̱' benne' ca' dxelune̱' da cale̱la ládujla benne' xrlátaje ca'.
50Xuluzré̱'e̱ benne' ca' dxelune̱' da cale̱la lu xi' gabila, naga xelebezre̱', ne xeláguxa'ate̱ lazxe̱'.
51Nadxa bche̱be Jesús benne' ca', dxenné̱': ―¿Dxéajni'ile le'e xúgute̱ da caní? Benne' ca' gulenné̱': ―Awe', Xran.
52Nadxa guzre̱' benne' ca': ―Gate tu benne' dxusé̱dene̱' da nadxixruj bea Dios, ne nazé̱dene̱' ca dxenná bea Dios, naque̱' ca tu benne' xrane xu'u nézene̱' cuéaje̱' da zaj naca na da cube, ne da zaj naca na da gula ládujla da nuzrá chawe̱'.
53Gate bexuzre bchalaj Jesús da dxulé'e na caní, na' bezé̱'e̱ na'.
54Bezrine̱' naga naca lazrie̱'. Na' guzú lawe̱' dxusé̱dene̱' benne' ca' zaj zre̱'e̱ lu xudau' chee̱ xe̱zre na', na' belexebanne benne' ca', gulenné̱': ―¿Gazra bse̱de benne' nigá xel-la' sina nigá? ¿Ájazra dxune̱' xel-la' waca caní?
55Benne' nigá naque̱' zri'ine gubizre xaga, na' naca xrne̱'e̱ María. Naque̱' bi biche Jacobo, ne José, ne Simón, ne Judas.
56Bi zane̱' zaj zue̱' nigá nen dxi'u. ¿Ájazra na' dxaca dxune̱' da caní?
57Chee̱ le̱ na' buluzúe̱' Jesús chalá'ala. Jesús guzre̱' benne' ca': ―Xúgute̱ benne' xula dxelape̱' ba lá'ana tu benne' dxuchálaje̱' waláz chee̱ Dios. Benne' lazrie̱', ne xrtia ljwezre̱' quebe dxelúne̱' ca'.
58Jesús quebe bé̱nteque̱' na' xel-la' waca ca' lawe' da quebe guléajle̱'e̱ chee̱'.
