San Lujc 7:11-27

¹¹Chi gudëd gojc zian, wej Jesús tijb luguiedx la Naín binë ree xbejnman, në zien ree ben ren.

¹²Chi bidxinman gajxh roꞌ guiedx guin, baguiaaman ziquieꞌch reeman tijb xingüt, tijbzi laax na̱j xiꞌn xniaax, najman bén bizëjb. Zien daꞌt ree bénluguiedx guin zinal laaman.

¹³Chi baguiaa Dad Jesús laaman, bayaman laaman, dxel rëbaman lojman: ―Ad roonl.

¹⁴Abiꞌ bibig Jesús baquiꞌman xcaj xingüt guin, dxel guzudxe ree bén zinë laax. Zianz rëbaman lojx: ―Xiꞌn, naj rni lojl: ¡Bixche!

¹⁵Dxel gureli xin guin, guzuloj caneex, zianz bayü Jesús laax loj xniaax.

¹⁶Chi baguiaa reeman zian, graczi reeman bidxeb guzuloj cuzaꞌt reeman Dios zagdxe, rëb reeman: ―Du loj ree ma gules Dios tijb bén zojbloj, bén rudëë xtiidx Dios loj ree bejn. Rëb tëë reeman: ―Ma biꞌt Dios din gagnë ree xbejnman.

¹⁷Abiꞌ guidib niz Judea në ree guiedx rigaꞌ niz yagaj gogbee ree bejn ni been Jesús.

¹⁸Gogbee Waj gra ree ni cayüjn Jesús, guial bagojn ree xbejnman laaman. Abiꞌ guneeman tioꞌp reeman,

¹⁹dxel guxhaalaman laa reeman loj Jesús din chignabdiidx reeman bal laacaman na̱j Cristo bén na̱j diidx guiꞌt, bén cabëz reeman, o cwëz reeman ben ren ya.

²⁰Abiꞌ bibig reeman, guneenë reeman laaman, rëb reeman lojman: ―Waj bén ruroobnijs bejn ree guxhaal dunujn lojl zudganabdiidxan bal lüjcan na̱j Cristo bén na̱j diidx guiꞌt, bén caylëjzan o yalëjzan ben ren ya.

²¹Hor ziigajc bayüjn Jesús zien daꞌt ree bénragxuu, në ree bén rdoob, nëtëë ree bén yuꞌ xindxab luxdoo, baxhal tëëman loj ree bénlutiaꞌp.

²²Dxel badxiꞌ Jesús xtiidx ree bén guxhaal Waj, rëbaman: ―Gol chej, gol chiguiedx loj Waj ni cuguiaadi në ni caguiejndi. Gol güjdx lojman guial ma ruguiaa ree bénlutiaꞌp, ma rajc rza ree bencoj, ma rayajc tëë ree bén goc guialguijdx la lepra, ma riguiejn ree bén nacwaꞌt, guiáad ree bengüt ma baban reeman, abiꞌ ree bénprob ma caguiejn reeman xtiidxzaꞌc Dios.

²³¡Xiquilbaa ree bén ad zucwëëzt chililadx naj!

²⁴Chi baza ree bén guxhaal Waj, guzuloj Jesús caneeman xcwent Waj loj ree bejn, rëbaman: ―¿Chu naladxidi na̱j bén biquiaadi loj yujbidx? ¿Naladxidi ya najman ziꞌc tijb biqui runiib bi?

²⁵¿O chu biquiaadi? ¿Tijb bén najcw lajd zagdxe ya? Lëjt ragbee guial bén rajcw ree lajd zagdxe, në ree bén naban zagdxe, lën palas zojb reeman.

²⁶¿Chu biquiaadi? ¿Tijb bén rudëë xtiidx Dios loj ree bejn ya? Per diidxliczi rnin lojdi, biquiaadi tijb bén mazri zojbloj guial loj tijb bén rudëë xtiidx Dios loj ree bejn.

²⁷Wajn na̱j bén ruzaꞌt xtiidx Dios, lod rëb: Naj rxhial tijb bén ned lojl, bén güünchaaw xnejzil.