SAN LUCAS 24:13-43

¹³ꞌBa ndekuini nixtjinbiu jó xutare Jesús inyafi naxinanda chi xi Emaús ꞌmi, naxinanda xi tejnguru kilómetro mare naxinanda Jerusalén.

¹⁴ꞌBa nga inyafi, inyafako nijmi xinkjin ngatꞌare ngayéje xi kuán.

¹⁵ꞌBa yejerañu inyafo nijmi, ndekui fani Jesús kitsitiñatꞌare ꞌba ñatjen kijiko ngaya ndiyo.

¹⁶Tunga nchjabiu bi be ꞌyá= ni kui, ngatꞌa Naꞌenchana ꞌechjaꞌndere nga skuexkun.

¹⁷ꞌBa Jesús tsiningiyare: —¿Mé= xi techuba nijmiko xingiu nga temangiun ndiyo? ꞌBa nchjabiu ba tjinre nga tsikinyaꞌñu.

¹⁸ꞌBa kio xuta xi Cleofas ꞌmi kitsure: —¿A tu ji sani xi jaꞌekitjajme naxinanda Jerusalén xi bi be mé= xi kuán saꞌe fa tiña ngandaꞌe?

¹⁹ꞌBa Jesús tsiningiyare: —¿Mé= xi kuán? ꞌBa nchjabiu kitsure: —Ngatꞌare xi kuataꞌen Jesús tseꞌe Nazaret. Kui xi kuán jngu profeta xi kitsaꞌen kjuakun yaꞌe, ꞌba ko en xi kisꞌere kjuaꞌñu yakuya ngixkun Naꞌenchana ko ngatsiꞌi xutankjiun.

²⁰Tunga xi ngakure naꞌmiu ko xutaxa ni kitsingantsja, tuxi kjuinikꞌenni, ꞌba kisꞌetꞌa kru.

²¹ꞌBa ji̱n kjinikjaꞌetsjee̱n tsakaiñu nga kui= xi sindai naxinanda Israel. Tunga je kuaján nixtjin nga ꞌba kuán.

²²ꞌBa nde yakꞌa yanchjin xi tjin ngajinni̱ kaminyakunni̱. Ngu saꞌe tajña kafi tsju,

²³tunga bi kamasjaire yojore Jesús. ꞌBa kafaꞌetsuni nga ankjele kamatsejenre ꞌba nga kui katsure nga tijñakun Jesús.

²⁴ꞌBa jaskan yakꞌa nchja xi tjin ngajinni̱ ꞌba nde kafi tsju ꞌba ꞌba fa tsaꞌen kabe jofa katsu yanchjinbiu, tunga bi kabe Jesús.

²⁵ꞌBa Jesús kitsure: —¡Á chikunñu ꞌba taja koni inimanu nga bi nda makjainnu ngayéje xi kitsu nchja chinga profeta!

²⁶¿A bi tjinnere nga kjuaꞌaxtiu kjuanima xi Cristo ꞌmi, kionga kje sa̱kujínre kjuajere?

²⁷ꞌBa saꞌe Jesús kitsuyare nchjabiu jó tsunire ngayéje xujun enre Naꞌenchana nga tinchja ngatꞌare kui. ꞌEtutsꞌinnire xujun xi kitsiꞌindu Moisés kaꞌnda nga kitsikjetꞌa ngayéje xujun xi kitsiꞌindu nchja chinga profeta.

²⁸ꞌBa kionga je kuatiñare naxinanda chi ña inyafi nchjabiu, Jesús kitsaꞌen joni tsa kuaje ndiya.

²⁹Tunga nchjabiu ꞌenere nga kꞌuejñako, ꞌba kitsure: —Tenikonii̱ ngaꞌe, ngatꞌa je kuangixun ꞌba je tjimaꞌña. Kui kjua Jesús kikoni, ꞌba tsikꞌejñako nchjabiu.

³⁰ꞌBa kionga je tjindutꞌa yamixo, Jesús kiskjebe niñuxtilo ꞌba kitsjare kjuanda Naꞌenchana. ꞌBa yakjanya ꞌba kitsjare nchjabiu.

³¹ꞌBa tukjiaꞌa kitjuꞌingi xkun nchjabiu, ꞌba tsabexkun Jesús. ꞌBa ndekuini chubabiu Jesús kichajajin isen ngixkun nchjabiu.

³²ꞌBa kitsure xinkjin: —Kuiru̱ kjua tsja kuánnire inimana kionga tifakona ngaya ndiyo, ꞌba kionga titsuyana jó tsunire mé= xi kuaꞌindutꞌa enre Naꞌenchana.

³³ꞌBa ndekuini chubabiu tsisetjen ꞌba kiji ngani naxinanda Jerusalén, ꞌba kio tsabe nga kuañajan xutare xi tejngu ko nchja xi tjinduko.

³⁴ꞌBa nga echu, kikꞌinre: —Kjuakixi= nini nga je jaꞌaya nganire ngajinre mikꞌen Naꞌenna ꞌba je kuatsejenre Simón.

³⁵ꞌBa saꞌe ngojó nchjabiu yeꞌere nijmi mé= xi kuánre ngaya ndiyo ꞌba jótsaꞌen tsabexkun Jesús nga yakjanya niñuxtilo.

³⁶ꞌBa yejerañu inyafo nijmi xutare ngatꞌare kibi, Jesús jaꞌekasenjin masenre, ꞌba kitsure: —Ngatjasꞌenu kjuaxiu.

³⁷Tunga xutare ꞌñu kitsakjun, ꞌba kitsikjaꞌetsjen nga inyabe jngu isennixtjin.

³⁸ꞌBa Jesús tsiningiyare: —¿Ánñu tekunñu? ¿Ánñu jó ján tefañu inimanu nga ꞌbatsaꞌen tenikjaꞌetsjion?

³⁹Kui= ña̱. Chutsejenꞌo ndsaa̱ ko ndsakua̱. Tikonuu̱ ꞌba chutsijon. Jngu isennixtjin tsajainre yojo ko ninda jotsaꞌen jun teꞌyo nga tjinna̱ an.

⁴⁰ꞌBa kionga je ꞌba kitsure, yakure ntsja ko ndsaku.

⁴¹Tu kjuare nga ꞌñu tsja kjimare nchjabiu ꞌba inyamakunkonire, kui kjua bi inyamakjainre. ꞌBa meni Jesús tsiningiyare: —¿A tjinchinu xichina ngaꞌe?

⁴²ꞌBa ꞌbatsaꞌen kitsjachire tjiuti tsju,

⁴³ꞌba Jesús kiskjebe ꞌba kiskine ngixkun nchjabiu.