San Lucas 13:2-17

²Jesús qui³tso²-le⁴: Jo¹ vi³xon¹³, a³ nqui²sa⁴ to⁴cho⁴ta⁴tsˀen⁴ coan³ je² cho⁴ta⁴ galileo cao⁴-ni³ tsa² nca³tsˀi³ cho⁴ta⁴ galileo, nca⁴ cˀoa⁴-sˀin² tsa³cja³ˀa¹ cjoa⁴ñˀain³.

³Ma³jain², xin³-no³, to⁴nca³ tsa² tsi² si⁴cˀa³ntjai²ya³ nqui²ntia³-nio³ cjoa⁴fa³ˀai³tsjen³-no³, cˀoa⁴-ti⁴sˀin² coi⁴ya¹-nio³ˀni³.

⁴A³xo⁴ je² xi³ čhja³ˀaon²jan² xi³ torre qui³sca³ne²-le⁴ ya⁴ Siloé, cˀoa⁴ qui³si³cˀen³-ni¹, jo¹ vi³xon¹³, a³ nqui²sa⁴-sa³ tse³ qui³tjen⁴-le⁴ cao⁴-ni³ tsa² nca³tsˀi³ cho⁴ta⁴ xi³ tjio¹ ya⁴ Jerusalén.

⁵Ma³jain², xin³-no³, to⁴nca³ tsa² tsi² si⁴cˀa³ntjai²ya³ nqui²ntia³-nio³ cjoa⁴fa³ˀai³tsjen³-no³, cˀoa⁴-ti⁴sˀin² coi⁴ya¹-nio³ˀni³.

⁶Cˀia⁴ Jesús qui³tso² je² cjoa⁴xco¹son²: Jnco³ cho⁴ta⁴ xi³ tjin¹-le⁴ ya¹ higo xi³ tjin¹ntje²-le⁴ ya⁴jin³ tso³jmi²ntje²-le⁴. Ja³ˀai³ ca¹sjai³ to³-le⁴, cˀoa⁴ li²coi³ qui³sa³co³-le⁴.

⁷Cˀoa⁴ qui³tso²-le⁴ xi³ si¹coi²nta⁴ tso³jmi²ntje²-ve⁴: Coe⁴-ni³, je³coan³ jan² no¹ nca³ fa²ˀai⁴ ca³sje²³ to³-le⁴ ya¹ higo xo⁴ cji³-vi⁴, cˀoa⁴ li²coi³ sa³co¹-na³. Ti⁴chao¹³, a¹-ni³ nca³ to⁴cjoa⁴tjao² si¹cji³tson¹-ni³ na³nqui³.

⁸Je² cho⁴ˀnta³-ve⁴ qui³tso²-le⁴: Señor, ca²ta³se¹jna³-la²sa³ to⁴je²-sa³ no¹-vi⁴ sa³ˀnta³ coi³ncha²xan⁴-le⁴ na³nqui³, cˀoa⁴ si³tje¹ˀnte³-le⁴.

⁹Cˀia⁴ tsa² no¹ xi³jnco³ coa⁴-le⁴ to³, nta³-ni¹ˀni³. Cˀoa⁴ tsa² mai³, coi⁴chai¹³-ˀni³.

¹⁰Jnco³ ni⁴čhjin³ ni²cja¹ya³ Jesús tsa³ca³co¹ya³ ya⁴³ ntˀia³ sinagoga.

¹¹Coe⁴-ni³ jnco³ chjon⁴² xi³ čhja³ˀaon²jan² no¹ tjin¹-le⁴ ntjao⁴ xi³ nta³jin³ xi³ tsjoa¹-le⁴ chˀin³. Cji³nia³ nca³ tsˀa³mjen³, cˀoa⁴ ni⁴to⁴jo³-jin²sˀin² ma³qui²xi⁴.

¹²Cˀia⁴ nca³ Jesús tsa³ve³, qui³nchja⁴-le⁴: Chjon⁴², je³to²mjen³nta³-lai⁴ chˀin³-li⁴.

¹³Jesús tsa³ca¹jna³son²-le⁴ ntsja³, cˀoa⁴ nti⁴ton⁴ tsa³cja³qui²xi⁴-ni³, cˀoa⁴ tsa³cˀa³sje³je³ya³ Ni³na¹.

¹⁴Je² cho⁴ta⁴ti¹tjon²-le⁴ ntˀia³ sinagoga coan³jti³-le⁴, nca³ Jesús qui³si³xqui³-le⁴ cˀia⁴ nca³ ni⁴čhjin³ ni²cja¹ya³. Cˀoa⁴ cho⁴ta⁴ti¹tjon² qui³tso²-le⁴ cho⁴ta⁴ncjin² xi³ ya⁴ tjio¹: Jaon³ ni⁴čhjin³ tjin¹-ni³ nca³ ma³ ni²xa¹. Coi³ ni⁴čhjin³-ve⁴ nčhoao¹³, cˀoa⁴ coan⁴nta³-nio³, cˀoa⁴ mai³ cˀia⁴ nca³ ni⁴čhjin³ ni²cja¹ya³.

¹⁵Cˀia⁴ je² Nai³-na¹ qui³tso²-le⁴: Cho⁴ta⁴ jao²ncjain¹ nio¹³. Jnco¹jnco¹ nca³ jon²-vi⁴, a³ tsi² chjo¹jnta¹nˀion¹³ nčha⁴ja⁴-no³ a³xo⁴ bo¹rro¹-no³ ya⁴ ntˀia³cho⁴-ve⁴ cˀia⁴ nca³ ni⁴čhjin³ ni²cja¹ya³, cˀoa⁴ coa⁴nquin¹cao⁴³ nca³ coa⁴nquin¹ ni²cˀio³ na³nta¹.

¹⁶Cˀoa⁴ je² ˀnti¹tso²ti³-le⁴ Abraham xi³ Satanás tsa³cˀe¹nˀion¹-le⁴ čhja³ˀaon²jan² no¹, a³ tsi² tsa² ma³chjen¹ nca³ tjo¹jnta¹ je² chjon⁴²-vi⁴ coi³ ni⁴čhjin³ ni²cja¹ya³.

¹⁷Cˀia⁴ nca³ ti¹tso² je² cjoa⁴-vi⁴, coan³soa³-le⁴ nca³tsˀi³ xi³ co²ntran⁴-le⁴, to⁴nca³ nca³tsˀi³ cho⁴ta⁴ncjin² coan³tsjoa³-le⁴ nca³yi³je³ cjoa⁴ xi³ je³ya³ xi³ Jesús qui³sˀin³.