SAN JUAN 9:1-16

¹Láth nda riid Jesús par ned nda Jesús, gunèe Jesús thìb mbi' sieu co' ngóol sieu co' ndub par neda.

²Myen' xin' mté'th Jesús mnibdi's loo Jesús. Ndxab myen': ―Maistr, ¿chonon texal ngóol mbi' ba' sieu mbi', à'? ¿Ché' tac ngòp xud mbi' xtol xud mbi' no ngòp xna' mbi' xtol xna' mbi' cona ngóol mbi' sieu o ché' naca por xtolpe' mbi', cona ngóol mbi' sieu, cà'?

³Jesús ndxab loo myen': ―Aa que tont gu' se. Ne'ngáalte mbi' ba' sieu por xtolpe' mbi'. Ne' ne' ngáal mbi' sieu por xtol xud mbi' no por xtol xna' mbi'. Ndxe'leque', mbi' ba' ngóol sieu par ryo xo'f con' ndxác Diox li Diox loo mèn loo xnaa loo mbi'.

⁴Ndxàalque' lin zin' co' nac rsin' xa' co' mtel' daa láth be' ngue tee'en loo izlyo' ndxè' xal ndli mèn zin' ndxáal ze co'se' ntenìi xnìi huiz. Tac yé' huize' gàca loon xal co'se' nde yál' loo izlyo' no yende chó mèn gác li zin' hora.

⁵Cona, niin loo gu': Láth be' nzon loo izlyo' ndxè' nac daa xa' co' ndli par ndyub xnìi yéc mèn no par ndyub xnìi lezo' mèn co' nziri' loo izlyo' ndxè' loo cón che'n Diox.

⁶Ngolo gunii Jesús di'sa loo myen' xin' mté'th Jesús, msuc Jesús loo yòo. No mcos Jesús chu'th ben loo yòo con rsuc Jesús. Ngoloa, mtà Jesús bena ngudloo mbi' sieua.

⁷Ngoloa, ndxab Jesús loo mbi'a: ―Huàa tech ngudlool ro tanc co' lèe Siloé ba'. Di's Siloé nee di's ntel' mèn mèn. Sya, xex xex nda mbi' sieua ro tanc. Ngua tech mbi' ngudloo mbi'. Co'se' mbere mbi', ndye'th mbi' loo Jesús, ndxe'sleque' ngüi' mbi'.

⁸Sya, rye mèn co' nzi'f liz gax co'te' ndub liz xud mbi' no rye mèn co' gunèe mbi' ndoore' xyal' ngudloo mbi', mèna ndxab loo xtàa mèn: ―¿Ché' inacte mbi' ba' mbi' sieu co' ndyub ña'b gòn, cà'?

⁹Sya, mbez ndxep mèn loo xtàa mèn: ―Aa. Mbi' ba'i. Per taandxep mèn mbez: ―Tyè'. Inacte mbi' ba' mbi'a, yey. ¿Ché' indyacte gu' te' ñaa mbi'a ñaa mbi' ba', ¿lé'? Per yub mbi' sieu mbez loo mèna: ―Daaai. ¿Ché' ngue li gu' cuent inacte daa mbi'a, cà'?

¹⁰Sya, mnibdi's mèna loo mbi' sieua. Ndxab mèna loo mbi': ―¿Xá mod ngòca lool? ¿Chonon ngüi'lel nalle', sya?

¹¹Mbi' mcàb loo mèna. Ndxab mbi': ―Mbi' co' lèe Jesús mcos chu'th ben loo yòo. Ngoloa, mtà mbi' ben ngudloon. No gunee mbi' loon: Huàa tech ngudlool ro tanc che'n Siloé ba'. Ngua techen ngudloon. No co'se' ngolo mtechen ngudloon, chàa, ndxe'sleque' mbui'en.

¹²Sya, mnibdi's mèna loo mbi'. Ndxab mèna: ―¿Pá nzo mbi' co' lèe Jesús nalle', à'? Mbi' sieua mcàb: ―Ne no. Ne'needen pá nzo mbi'.

¹³Sya, mbe' mèna mbi' co' ngóol sieua loo mèn xley' farise.

¹⁴Huiz co'se' mcos Jesús ben no mxal' Jesús ngudloo mbi' sieua, huiza ngòc huiz sabd co' ngòc huiz descans tiempa.

¹⁵Sya, mbere mèn xley' farise, mnibdi's mèna loo mbi'a tedib vez: ―¿Xá mod ngòc mxyal' ngudlool par ngüi'l nalle', à'? Ndxab mbi' loo mèna: ―Mbi' co' lèe Jesús mtà chu'th ben ngudloon. Ngoloa, ngua techen ngudloon. Cona, ndxe'selque' ngüi'en nalle'.

¹⁶Sya, ndxab ndxep mèn xley' farisea loo mbi' co' ngóol sieu: ―Mbi' co' mbli con'a con lùu, mbi'a inacte mèn che'n Diox tac indlide mbi' cas huiz sabd co' nac huiz descans. Per taamas mèn mbez: ―Per ¿xá ngobe' gu' xá mod gác thìb mbi' co' ndxàp xtol li mbi' yalguzye' co' ngòc loo mbi' ba', yey? No ale leque mèn xley' farise ngro yoo di's làth xtàa mèn.