San Juan 7:32-44

³²Beṉe' fariseo ca' gosende' diža' cheso'e beṉe' ca' c̱he Jesúsen'. Da'nan' bosoxi'e len beṉe' ca' zjanac bx̱oz gwnabia' c̱he nación Israel c̱heton' na' goseseḻe' beṉe' chesape' yodao' blaon' cont šjasexene' Jesúsen'.

³³Nach Jesúsen' bsed blo'echde' beṉe' ca' že'na', gwne': ―Soacha' yeto tiemp dao' len le'e nach yeya'a gan' zoa ben' gwseḻa' neda'.

³⁴Na' yeyiljwle neda' na' bi yeželele neda', ḻe gan' soan' bi gac yidle.

³⁵Nach beṉe' gwnabia' c̱he nación Israel c̱heton' gose' ḻježe': ―¿Gan' chacde' yeyeje' ga bi yeželechone'? ¿Yeyeje' gan' zjanasḻas beṉe' gualaž c̱hecho ladjo beṉe' griego ca' na' gwsed gwlo'ede' ḻegaque'?

³⁶¿Bi zejen dan' gwnen': “Yeyiljwle neda' na' bi yeželele neda' na' gan' soan' bi gac yidle”?

³⁷Ža cate' zelao chesone' ḻṉin' naquen ža xench, na' Jesúsen' zeche' chsed chlo'ede' na' gwṉe' zižje, gwne': ―Note'tezle še ḻo' yic̱hjlažda'olen' nacle ca beṉe' chbiḻlaže', cheyaḻa' šejnilaže'le neda' na' goṉa' le'e yeḻa' mban toḻi tocaṉe, na' ḻenṉa' gaquen ḻo' yic̱hjlažda'olen' ca to nis da' gwbat cheyo'ojen cont bich gacle ca to beṉe' chbiḻlaže'.

³⁸Le'e chejnilaže'le neda', gac c̱hele can' ža Xtiža' Diosen' da' nyojen, to da' güen juisyw gac ḻo' yic̱hjlažda'olen' cont gacle ca to yežlio ga chaldi nis, gan' de zan yegw da' cheseyilen ḻen.

³⁹Na' dan' gwna Jesúsen' ca' be'e diža' c̱he Spiritw c̱he Diosen' da' yedesoan ḻo' yic̱hjlaždao' note'tezcho chejnilaže'chone'. Na' caten' gwne' ca' Spiriton' biṉa' yedesoan ḻo' yic̱hjlaždao' beṉe', ḻe biṉa' gac yogo' da' cheyaḻa' gac cont gacbia' Jesúsen' naque' beṉe' zaca' juisyw.

⁴⁰Beṉe' ca' chosozenag xtiža' Jesúsen' baḻe' gosene': ―Da' ḻi benga naque' ben' choe' xtiža' Diosen' ben' naquen yide'.

⁴¹Na' yebaḻe' gosene': ―Benga Criston' ben' naquen yedeṉabia'. Perw yebaḻe' gosene': ―¿Bixe ṉacho beṉe' Galilea ba gwlej Diosen' cont yedeṉabi'e chio'?

⁴²Xtiža' Diosen' da' nyojen žan Criston' ben' yedeṉabi'e choje' ḻo diaža c̱he da' rey David na' gaque' beṉe' Belén gan' nac laž da' David.

⁴³Can' goc beṉe' ca' gosaque' c̱hople ṉec̱he Jesúsen'.

⁴⁴Na' baḻe' gosaclaže' yesezene'ne', perw nono gwzen ḻe'.