San Juan 7:13-22

¹³Quebe nu benne' bchálaje̱' caníqueze ca naca chee̱' lawe' da dxelezrebe̱' da xelún benne' xíchaje̱ ca' chee̱ judío ca'.

¹⁴Ba zeaj gachaj laní na' gate guxú'u Jesús lu chale'aj xudau', na' guzú lawe̱' dxusé̱dene̱' benne' zaj zre̱'e̱ na'.

¹⁵Belexebane benne' judío ca', dxelenné̱': ―¿Ájazra na' benne' nigá da zante̱ nézene̱', ne quebe bsé̱die̱' chee̱ xudau'?

¹⁶Beche̱be Jesús: ―Da dxusé̱deda' neda' le'e quebe naca na cheé̱zqueza'. Naca na chee̱ Xra' nasel-le̱' neda'.

¹⁷Che nu benne' dxaca lazre̱' gune̱' ca da dxaca lazre' Dios, na' wanézene̱' che da dxusé̱deda' naca na chee̱ Dios, u che dxennéa' ca da naca cheé̱zqueza'.

¹⁸Benne' dxuchálaje̱' da naca cheé̱zqueze̱' dxune̱' na chee̱ xelapa bénneache le̱' ba lá'ana. Bénnea' dxue lazre̱' xelapa bénneache ba lá'ana bénnea' gusel-le̱' le̱', benne' nigá dxenné̱' da li, ne quebe bi dxenné̱' da naca na da we̱n lazre'.

¹⁹’Moisésqueze be̱nne̱' le'e da nadxixruj bea na, na' netule le'e quebe dxuzúale dizra' chee̱ da nadxixruj bea na na'. ¿Bizr chee̱ na' dxaca lázrele gútele neda'?

²⁰Belexeche̱be benne' zan ca': ―Xu'u lue' be' xriwe̱'. ¿Núzraqueze dxaca lazre' gutie̱' lue'?

²¹Jesús guzre̱' benne' ca': ―Tu xel-la' waca be̱na' lu zra dxupá'anale, na' xúgute̱le le'e dxebánele.

²²Moisés be̱nne̱' da zéajle̱le, dxechúgule late' weaj be̱la' chee̱ be̱l-la' dxen chee̱ zrí'inele bi biudu ca' chee̱ xelexegá'anabe' xrlátaje lau Dios. Da nigá da dxunle quebe guzú lau na gate na' zua Moisés. Guzú lau na gate zaj zra' xra xrtau Moisés cá'ante̱. Chee̱ le̱ na' le'e dxechúgule late' be̱la' chee̱ be̱l-la' dxen chee̱ tu bi biúdau' chee̱ xegá'anabe' xrlátaje lau Dios lácala naca zra dxupá'anale.