San Juan 6:34-54

³⁴Suasne uspane paikuara: —Anpat. Aumɨza an kumira kwinchain, pailta payukima uznapa.

³⁵Jesúsne kaiznara: —Nane Diostas kumirakanain ish. Nane uruza pailta payu uzninnashinas. Nawa amtumikane mizurainkas we nɨjkulanazi, Diosta piankamtu akwa. Nawa nɨjkultumikane pailta payukima Diospa kamshina, Diosta an piankamshimtu akwa.

³⁶Ñamin sunpa uruza kaiznara. Nawa izarakas, une nawa nɨjkulamtuchi.

³⁷Wan ap Taitta nawa mɨlamturuzne nawa aamtu. Nane nawa attuza sapnanash, usparuza ap izmuruz namanapa.

³⁸Nane chiyuras kihshtau. Na kishimtu aizpa kimtuchish. Ap Taitta nawa ɨninta akwa, nane us pashimtu aizpa kishimtus.

³⁹Ap Taitta nawa ɨninta aizpa kinash, us nawa mɨlattuza kamanpa. Nane minpa payura usparuza irɨttas kuhsninnanash.

⁴⁰Ap Taittane, nawa ɨnintamikane, sun kishimtu, wan awa Dios painkulta izat kit nɨjkulanapa, pailta payukima uzanapa. Suasne minpa payura usparuza irɨttas kuhsninnanash.

⁴¹Suasne Judío awa ɨninturuzne Jesúspa kwail kizamɨzta, “Nane chiyuras taizta kumira ish” kizta akwa.

⁴²Usparuzpain kaizara: —An ampune Jesús i. Joséwa painkul i. Aune paiña papihshtakas akkuhshtakas pianmakpas. ¿Mizama ka kiztui, “Usne chiyuras kihshta?”

⁴³Suasne Jesúsne sɨnkanat kit kaiznara: —Uruzpain nawa kain kwail kizman.

⁴⁴Ap Taittane, nawa ɨnintamika i. Dios awaruza nawa karamtukine, mɨnminkas nawa asachi. Nane nawa atmikasha minpa payura kuhsninnash.

⁴⁵Dios kainammmikane pɨnkɨhta ka parɨt: “Diosne wanta kamtananazi.” Sunkana Taittara mɨamturuzkas us kamtara aizpa piankamturuzkas nawa aanazi.

⁴⁶Mɨnminkas mizurainkas Taittara iztachi. Mazain, Diostas atmikain, Taittara izta.

⁴⁷Watcha kaiznamtus. Nawa nɨjkulamtumikane pailta payukima uznazi.

⁴⁸Nane kumirakanain ish, awaruza uzninana.

⁴⁹U ñancha kwal pul sukin maná kumira kuarakas, wanne iarɨt.

⁵⁰Nane chiyuras kumirawa paranamtus. Mɨnpazha ussa saptane, mizurainkas imanazi.

⁵¹Nane an kumira chiyuras taizta aizpa ish. Nawa saptumikane pailta payukima uznazi. Na kumira kwintu aizpa ap ña i. Nane ap ña kwinnanash, wan awa uznanapa.

⁵²Katmizna Judío awa ɨninturuzne Jesúspa tɨnta kwinta kiat kit usparuzpain kaizara: —An ampune ¿Mizama paiña ña kwinshina, au kuwiznapa?

⁵³Jesúsne kaiznara: —Watcha kaiznamtus. Na u akwa irɨkane, ap aimpi puznazi. Nawa chiyuras ampura saptukine, une watcha uzamanazi.

⁵⁴Nawa saptumikane pailta payukima uznazi, na us akwa irɨt akwa, ap aimpi us akwa puztɨt akwa. Nane minpa payura ussa kuhsninnash.