San Juan 6:17-31

¹⁷Otlejkokeh itech se barka iwa opé kikojchalwiah n lago para ajsitiweh kan altepetl de Capernaúm. Ijkuakó yotleyuak, Jesús ayamó okwalinmajsia.

¹⁸Ijkuakó se ejekatl chikaktik opé kitlatlamotla n atl.

¹⁹Iwa yoyayah kemi se mákuili noso chikwase kilómetro itech atl. Okitakeh n Jesús nejnentiwits ixko atl iwa yokualinmasia. Ijkuakó yejwah omomojtijkeh,

²⁰pero Ye okinmili: —Amo ximomojtikah, Ne ni Jesús.

²¹Ijkuakó yejwah opakeh iwa okitlejkoltijkeh itech barka. Iwa san nima n barka oajsito itech tlali kan oyayah.

²²Owalmostlatik, nochteh n tlakah non omokajkeh ik nepa lado de n lago, okitakeh okatka san se barka, iwa itlamachtijkawah n Jesús oyajkeh inselti, iwa Jesús amo oya inwah.

²³Satepa, oksikimeh barkas non owalaya de Tiberias okalakikoh kan ik okikuajkeh n paj, iwa Jesús omotlasojkamah inawak Dios.

²⁴Yika, ijkuak n tlakah okitakeh Jesús iwa itlamachtijkawah ayakmó ompa okatkah, otletlejkokeh itech nonteh barkas iwa oyajkeh Capernaúm okitemoto n Jesús.

²⁵Ijkuak okajsitoh n Jesús ik nepa lado de n lago, okitlajtlanijkeh: —Tlamachti, ¿kemania otikalakiko nika?

²⁶Jesús okinmili: —De milajka, de milajka nomechilia, nomejwah nonnechtemoah amo por ononkajsikamatkeh tlan kijtosneki n milagro non onikchi, yej porke onomechtlakualti asta kan ononmijixwikeh.

²⁷Amo xitekitikah por n tlákuali non kimati tlami, yej xitekitikah por n tlákuali non ayik tlami iwa kitemaka yolílistli. Non tlákuali Ne nomechmakas porke sanwel Ne Dios onechpéjpenki para nin tekitl.

²⁸Ijkuakó yejwah okitlajtlanijkeh: —¿Tlan tekitl moneki matikchiwakah para tiktekitiliskeh Dios?

²⁹Jesús okinnankili: —Ye ni tlan Dios okichi, iwa manechneltokakah Ne Akin Ye okualtítlanki.

³⁰Yejwah okilijkeh: —¿Tlan milagro techititis para matiktakah iwa timitsneltokaskeh? ¿Tlan weletis tikchiwas?

³¹Towejkatatawah okikuajkeh n paj non itoka maná kan tlaltejtéyinki, ijkó kemi kijtoa itlajkuilol Dios: “Paj de ilwikak okinmák makikuakah.”