San Juan 5:6-9

⁶Ijkuak Jesús okitak n kókoxki ompa wetok, okajsikama yowejka omokokoaya, iwa okili: —¿Tikneki tipajtis?

⁷N kókoxki okinankili: —Tejwatsi, amo nikpia akin nechapolakis ijtik tanke ijkuak molinia n atl. Iwa ijkuak ya nimopolakiti, ok se achto mopolakia.

⁸Jesús okili: —Ximewa, xikajkokui mopetl iwa xinejnemi.

⁹San nima non tlakatl owalpajtik, okajkok ipetl iwa onéjnenki. Non tonati okatka sábado ijkuak mosewia n judíos.