SAN JUAN 4:9-49

⁹Aaga najtaj naw Samaria tasaj Teat Jesús: ―¿Neol techej xicueaj yow, teat? Cos ique nop ic nipilan judío, nganüy xique nop najtaj nawas Samaria. Ique ijaw nipilan judío ngome áag andeacüw maquiüjpüw monaw Samaria ―aj.

¹⁰Quiaj tasaj nej Teat Jesús: ―Sitiül mejaw leaw Teat Dios alndom müüch, aton mejaw jane nechej icueaj yow, sayaag apmetün xicueaj, condom sanüüch ic yow leaw üüch mapacaran meáwan nüt ―aj.

¹¹Quiaj tasaj nej a najtaj: ―Teat, ique ngo mejiür cuane merwüneay yow, nganüy aaga lol cam xeyay nequiliüt. ¿Nguia naw apmeyar aaga yow ipiüng quiaja?

¹²Cos xexejchiün teat Jacob tacueat müüch xicon aaga lol cam. Nej tanganeow aaga yow, at micual nej, minimal nej. ¿Jow nganüy ique, alwüx itama, ngo matneje? ―aj nej.

¹³Quiaj tasaj nej Teat Jesús: ―Jangantanej apmanganeow a yow cam apmind anganeow yow alinomb.

¹⁴Pero jane apmanganeow aaga yow xique sanüüch, langome apmind anganeow yow alinomb. Cos aaga yow xique sanüüch, apmajlüy tiül nej atnej noic lol teapacaw müüch nej mapac meáwan nüt ―aj nej.

¹⁵Condom tasaj nej aaga najtaj: ―Teat, iich xic aaga yow ipiüng quiaj, quiaj langome apmind sanganeow yow alinomb, atquiaj ngo metam niün ningüy nayar yow ―aj nej.

¹⁶Quiaj tasaj nej Teat Jesús: ―Quiür ipaj minoj, iquiiüb miün ―aj.

¹⁷Quiaj tapiüng a najtaj: ―Ngo najiür xenoj ―aw. Quiaj tasaj nej Teat Jesús: ―Naleaing ipiüng ngo mejiür minoj;

¹⁸cos lamejiür acoquiaw. Nganüy aag almequiiüb, aag ayaj ngome minoj. Naleaing tepiüng ―aj nej.

¹⁹Camüm manguiay aag ayaj a najtaj, quiaj tapiüng: ―Teat, sapiüng ique nop nendeac andeac Teat Dios.

²⁰Isaj xic neol xexejchiün tarangüw casa Teat Dios cawüx wüx aaga tiüc quiaj, nganüy icona nipilan judío ipiüngan áagan tiül Jerusalén alndom marangüch casa Teat Dios ―aw.

²¹Quiaj tasaj nej Teat Jesús: ―Netam meyar sandeac, müm, cos aliüc miün nüt wüx ngome apmetam meamban wüx aaga tiüc quiaj, átan ngome apmetam meamban Jerusalén merangan casa Teat Dios.

²²Icona monaw Samaria ngo mejawan jane teamerangan casa; xicona mbich sajawan jane sarangan casa, cos naw tiül nipilan judío ajlüy jane apmawün wüx asoeteran.

²³Aliüc apmatüch a nüt, aag ayaj nganüy, cos jane naleaing ayamb Teat Dios wüx omeaats, apmajüiquich naleaing wüx omeaats arang, ngo mitsoj. Cos Teat Dios aton atquiaj andiüm marangüch casa.

²⁴Teat Dios Espíritu nej; jane apmayamb nej netam marang con omeaats, masey ngondom maxom majaw ―aj nej.

²⁵Quiaj tasaj nej a najtaj: ―Lanajaw aliüc Mesías, aaga nasoic Cristo. Wüx nej apmapeay apmasaj icoots nguineay ajlüy meáwan cuajantanej ―aj nej.

²⁶Teat Jesús tapiüng: ―Xique aag ipiüng quiaj, tenguial andeacar ―aw.

²⁷Aliünüw wüx andeacüw, quiaj ajngotoj minipilan Teat Jesús. Nejiw mbayajow wüx tajawüw Teat Jesús teandeac maquiiüb nop najtaj. Pero taton ngo matüniw nej manguiayiw cuane andiüm a najtaj, cuane wüx teamandeacüw.

²⁸Condom quiaj taw quiaj a najtaj, acueátan quiaj mingan nej; tamb andüy tiül cambaj, tasaj nipilan:

²⁹―Macaron, ijawan nop naxey lamasaj xic meáwan leaw lanarang. ¿Ngwüy ijaca, aaga Cristo neje? ―aj nejiw.

³⁰Quiaj tawüw tiül cambaj, tambüw majawüw Teat Jesús.

³¹Wüx nipilan nganaw mapeayiw quiaj, minipilan nej teamasajüw nej: ―Teat, mac iret ―ajüw.

³²Nej tasaj nejiw: ―Xique sajiür süet, icona ngo mejawan cuane ―aj nejiw.

³³Condom minipilan nej tapots atünayej menguiayayej: ―¿Ngwüy, aljane tajamiün üet neje? ―awüw.

³⁴Quiaj Teat Jesús tasaj nejiw: ―Icona apac imeajtsan wüx landoj iretiün, xique apac ximeaats wüx sarang leaw Xeteat Dios tüüch xic niün narang, cos sandiüm nandondoch minajiüt nej.

³⁵Icona wüx lapiürüch corrül ipiüngan: “Wüx lamatüch apiquiw caaw, quiaj apxaijnguiam omeaats corrül”, irawan. Nganüy xique sasaj icon: Netam mejawan a corrül, cos nganüy lajneaj xaijnguiam omeaats corrül.

³⁶Jane arang xenajiüt maxaing sapiür, sanangüy alinoic nüt, cos aaga arang quiaj apmajlüy meáwan nüt. Aaga nepiür, maquiiüb nexaing omeaats corrül, apmapac omeajtsüw nóiquian.

³⁷Ningüy ajüic naleaing leaw apiürang: “Pálwüx nepiür, pálwüx nexaing”.

³⁸Xique lanüüch icon meamban merangan xenajiüt. Aag ayaj apmajlüy atnej wüx nop mayambüch mamb maxaing omeaats corrül, masey ngome nej nepiür; cos pálwüx nesaj nipilan wüx xique, nganüy icona ipeánan mesajüw mayambüw xic ―aj nejiw Teat Jesús.

³⁹Xeyay nipilan monaw tiül aaga cambaj tiül iüt Samaria tayariw andeac Teat Jesús wüx tanguiayiw andeac aaga najtaj, cos tapiüng: “Tasaj xic meáwan leaw lanarang”, maw.

⁴⁰Wüx tapeayiw quiaj monaw tiül aaga cambaj quiaj, tapots masajüw Teat Jesús macül quiaj maquiüjpüw. Quiaj tacül quiaj ic nüt.

⁴¹Xeyay nipilan tayariw nej andeac wüx tanguiayiw nejay Teat Jesús tenguial aquiaach.

⁴²Condom tasajüw a najtaj: ―Nganüy mbich lanayariün andeac nej cos nejay tanguiayasan andeac, ngome áagan leaw tesaj xicon wüx nej. Nganüy sajawan naleaing nej aaga Cristo leaw lapiürang aliüc mawün wüx asoet nipilan meáwan wüx iüt ―ajüw nej.

⁴³Wüx tamong ic nüt quiaj, Teat Jesús taw Samaria, tamb andüy Galilea.

⁴⁴Masey nejay Teat Jesús tandeac nguineay nop nendeac andeac Teat Dios ngome andiüram tiül miíüt nej, nganüy nej apmandilil mandüy quiaj alinomb.

⁴⁵Wüx tapeay tiül Galilea, apac omeajtsüw majawüw nej monaw quiaj, cos nejiw laiünüw Jerusalén aton majawüw nangos nüt pascua. Tajawüw quiaj meáwan leaw nej tarang wüx nangos nüt.

⁴⁶Condom Teat Jesús tandilil alinomb andüy cambaj Caná tiül Galilea, niüng ninguinüt tangowüüch yow marang vin. Ajlüy tiül cambaj Capernaum nop natang nenajiüt ocueaj cambaj, xeyay iün andeow micual nej.

⁴⁷Aaga naxey quiaj wüx tanguiay Teat Jesús lapeay Galilea imiün Judea, tamb matüch quiaj majaw. Tapots matün ocueaj Teat Jesús mamb aniüng nej mamongoch iün andeow micual nej, cos laxeyay, laliüc mandeow.

⁴⁸Quiaj tasaj nej Teat Jesús: ―Icona sitiül ngo mejawan ateócan ngome apmeyariün sandeac ―aj.

⁴⁹Naleaing aaga nenajiüt xeyay tatün ocueaj Teat Jesús, tasaj: ―Teat, ich majmiüc imal imeaats, tabar wǘxan nganaw mandeow xecual ―aj nej.