San Juan 4:9-17

⁹Junni ya sonari Jesús tsanticaca meráto wepananue. Israelítalari Samárialaca pa jolajominue. Junni ya Samaria to sonari wepanato meráto itsantinue: —¿Nuri israelita joto, niyaito Samaria to sonabe pi panhanayun? tinue.

¹⁰Junni Jesuri itsantinue: —Diosi epe cuwanunca nuri miitoe. Lacanan miitoe mo jonunca. ¿Nuberi pi panhanayoco? Junni la mo jonunca miramanpari, labenan pi panhano jomin jonhoe. Lari uyan quiraque pica cuwano jomin joinhie tinue. Sonnasa carimin pica nuchi cuwano jomin joinhie tinue.

¹¹Aman Jesuri yaca quereiminlaca Diosibe sonnasa carimin joyoeque pato, sonnasa carimin pica cuwamin joyoe tinue. Junni ya sonari junca tuituto, tsa pica tsantinaeque tenca cato, itsantinue: —In forobi duque tenpe pi poe. Nuri pi canun itoe tinue. ¿Junto sonnasa carimin pica niyaito cachun? tinue.

¹²Chiquilachi matu tata, Jacobo tinun, in foroca quinue. Aman yabe yachi familialabe yachi opisa, wala tsanlabe in pibi nechi pi cato cuchimin jominlanue tinue matu mate. Junni yari in pi foroca chiquilachi puranue. ¿Nuri wari Jacóbocanan fe poden joyun? tinue.

¹³Junni Jesuri ya sonaca meráto itsantinue: —In pica cuchiminla manan pi manmunaralarachunae tinue.

¹⁴La pi cuwacari uyan quiraque jono joe. Ya pica cuchiminlari numatotiya peyan joto polelaichunae. Michi joe tilatichunae tinue. Yalachi tencabi pi bulananun cuwenta jochunae. Ya piri yalachi tencabi tenca mánta serade serade jiniichunae tinue. Jun piberi Diosichibi numatotiya sonnato polelaichunae tinue.

¹⁵Junni ya sonari Jesuchi fiquica jera catuituto, itsantinue: —Jun pica chiquechi cuwade! tinue. Cuwade! pi manmuquetusa, inte pi cabi manjatuchun.

¹⁶Junni Jesús yabe manpato, nuchi unilaca mancáchin! tinue.

¹⁷Junni sonari unila itonyoe tinan, Jesuri junca meráto tsa tie tinue. Nuri manteca unila tamin jotonan, amana tanun unilari nuchi unila itoe tinue. Junto unila itonyoe tito tsa tie tinue.