4Pero Jesús ndac̈ho: ―Soixin, ¿quedonda ndachjenji na janha yá? Tiempo ẍa ttiha para janha tsjenguijna chojni.
5Pero jehe janné Jesús ndac̈ho jan ngain chojni que tedanjo jehe vino mé: ―Nchehe ra cain tti jehe rrondattjo ra.
6Nttiha vintte incjaon nchíẍa de ẍo, tti vanchegonda chojni judío para vaconttixin na jinda rá na tsje nttiha inchin costumbré jehe na. Co cada nchíẍa mé vaguiquia inchin ochenta o cien litro de jinda.
7Jesús ndac̈ho ngain chojni que tettequia vino: ―Nchec̈he ra cain nchíẍa tehe de jinda. Co jehe na hasta joinchec̈hetaonca na cain nchíẍa mé,
8cottimeja Jesús ndac̈ho ngain na: ―Janché, dantsje ra nchin nda co ttjiohe ra niencargado. Co jamé joinchehe na.
9Co jinda mé ondadicjan nda vino co jehe noeha ttinó joixin vino mé, jeho cain chojni que cointtjecjan vino mé vinttenohe na ixin jehe na joantsje na jeho jinda. Co tti encargado vayé xinovio
10co ndac̈ho ngain xa: ―Cainxin chojni saho danjo na tti vino icha jian, co are cain chojni que dihi, atto ovihi na, cottimeja dihi na tti vino corriente. ¡Pero jaha diquenchjinha tti vino icha jian hasta jaxon!
11Jihi tti joinchehe Jesús ngain Caná de Galilea co jihi tti saho milagro que jehe joinchehe co milagro mé ẍagoxin ixin jehe Jesús chonda anto tsje joachaxin. Co cain chojni que vacao Jesús vitticaon na ngain jehe.
12Después de jihi, jehe Jesús co janné, co xanchó conixin cain chojni que vacao jehe Jesús sacjoi na para ngain rajna Capernaum, co nttiha vintte na canxion nchanho.
13Ixin ojoiconchian tti quiai dinhi pascua para ixin cain chojni judío, Jesús sacjoi para ngain ciudad de Jerusalén.
14Nttiha ngain patioe nihngo icha importante vittja Jesús chojni que tenchecji coxinttá, coleco, co conttoa, co chojni que tate ngain puestoe tti dasinguixinxin na tomi para chojni vachonda na suelto.
15Are Jesús vicon jihi, joinchechjian ná cuarta de jino, co joantsjexin cain chojni mé de nttiha, jehe na conixin colecoe na, co coxinttehe na. Co tti chojni que tedasinguixin tomi, joanqué tomí na ngataha nontte co cjoa mesa ndaha.
16Co Jesús nichja ngain cain chojni que tenchecji conttoa co ndac̈ho: ―¡Dantsjexin ra cain jihi de nttihi! ¡Nchechjianha ra ngain nchiandoha Ndodana ná ndásin!
17Cottimeja tti chojni que vacao Jesús ẍaxaon na ixin ndac̈ho ngain tti jitaxin Palabré Dios: “Janha anto toñaonxin nchiandoi.”
SAN JUAN 2
SAN JUAN 2:4-17