San Juan 20:9-27

⁹Ḻa' kana' aga ba wyajni'yeṉ'gakile' Cho'a Xtill' Chioza' gana' cho'en dill' yiban Jesúza' ladj beṉ' wetka'.

¹⁰Na'ch beṉ'ka' c̱hop non Jesúza' txen biyajgake' gana' zoagake'.

¹¹Na' Maríana' bigaaṉe' cho'a bana' chbelle'. Na' lo zej chbelle' bchekee kwenc̱he bwie' ḻoo bana'.

¹²Na' ble'ile' c̱hop anjl zoagake' do xtil, chi'gake' ḻoo bana', toe' chi' yic̱hjinna' na' stoe' chi' xṉi'alin gana' got' kwerp c̱he Jesúza'.

¹³Na'ch che'gake' Maríana': ―¿Berac̱he chbellzo', noolə? Na' golle' ḻegake': ―Chbell' daa ba bidḻejgake' kwerp c̱he X̱an'na', na' bi ṉezid' galə jaloogake'ne'.

¹⁴Shintg wne' ka', ka bllii jalawe'na' na' ble'ile' ze Jesúza' kolleena', per bi biyombi'e shi Jesúzan'.

¹⁵Na'ch che' Jesúza'ne': ―¿Berac̱he chbellzo', noolə? ¿Nodaa chiyiljo'? Na' Maríana' chakile' beena' chap yag zix̱kan', na' chi'ene': ―Beṉ'do', shi ba bibejo'ne', wnagach nad' galə jadix̱jo'ne' kwenc̱he yic̱hi'ane'.

¹⁶Na'ch che' Jesúza'ne': ―¡María! Na' biyec̱hje' na' wṉie'ne' dill' hebreo, chi'ene': ―¡Raboni! ―na' zejin: beṉ' chli' chsedi beṉ'.

¹⁷Na' che' Jesúza'ne': ―Bi gox̱oo nad', ḻa' biṉ' yiyep' kwit X̱a'na'. Ḻete biyaj, jaṉe beṉ'ka' nak nad' txen jayellgake' ba ziyaa kwit X̱a'na', beena' ḻekzka' nak X̱ale. Lljazoalen' Chios c̱ha'na', beena' ḻekzka' nak Chios c̱hele.

¹⁸Na'ch biza' María, beṉ' yell Magdálana', jayelle' beṉ'ka' nak Jesúza' txen nan ba ble'ile' X̱ancho Jesúza'. Na' golle' ḻegake' diika' goll Jesúza' ḻe'.

¹⁹Na' ka goḻ lo llana' bibane', lla nech c̱he xmanna', ba ndop nllag beṉ'ka' nak Jesúza' txen na' nsejtegake' yoona' daa chllebgake' beṉ'ka' chṉabia' beṉ' Israelka', ka gokbe'gakile' ba ze Jesúza' ladje'ka', na' chi'e ḻegake': ―Soashgale mbalaz.

²⁰Na' ka biyoll golle' ḻegake' ka', na'ch bliile' ḻegake' c̱hop ḻaate neena' na' kwit ḻi'ena'. Na' beṉ'ka' nakgake'ne' txen ḻe bibagakile' ble'gakile'ne'.

²¹Na'ch wize' Jesúza' ḻegake': ―Soashgale mbalaz. Ka bseḻ' X̱a'na' nad' kwenc̱he zidsoa' yell-lioni, ka'kzan chseḻaa le' llje'le cho'a xtillaana' yell-lioni.

²²Na' ka wde golle' ḻegake' ka', na'ch blobe' ḻegake', na' chi'e: ―Ḻi ikaa Espíritu Sántona'.

²³Na' beṉ'ka' yizi'xenle saaxya c̱he'ka', wiyakxenan. Na' beṉ'ka' bi yizi'xenle c̱heyin, bi yiyakxen c̱hegake'.

²⁴Tomáza', beena' che'gake' Dídimo nake' txen beṉ'ka' shlliṉ, na' bi lene' ka jali'lao Jesúza' ḻegake'.

²⁵Na' che'gake'ne': ―Ba ble'into' X̱anchona'. Na' Tomáza' chi'e ḻegake': ―Shi bi ile'id' neena' na' wde xben'ni gana' wde klabka', na' wde na'ni kwit ḻi'ena', aga wyajḻi'a.

²⁶Na' ka wde x̱on' lla, dii yoblə bidop beṉ'ka' nongake' Jesúza' txen ḻoo yoona' na' len Tomáza'. Na' ḻa'kzi nsejtegake' yoona', wyoo Jesúza' jsie' ladje'ka'. Na' chi'e ḻegake': ―Soashgale mbalaz.

²⁷Na'ch chi'e Tomáza': ―Bwia na'ni, na' bṉe'n xbeno'na'; na' bṉe' noona' kwit ḻi'ani. Bi gakc̱hoplalloo, san wyajḻe'.