SAN JUAN 19:3-34

³Oncan omopachohque tenahuac ic teahuiltihque, huan teiluiltihque: ―¡Ocachi cuali in hueyixtoc den judeahtecos! Huan oteixuitequiyayahque ipan texayac.

⁴Oncan Pilato oc sepa oquis, huan oquiniluic in tequihuahten: ―Xiquitacan, niquixtis nican ic xicmatican quen ahmo nicahxiliya niyan se tlahtlacoli.

⁵Huan oquixohuac in Jesús, ihuan in corona den huetztli ipan tetzonteco huan in tetlaquen chichilticatliltic. Oncan in Pilato oquiniluic in judeahtecos: ―¡Nicanca in tlacatl!

⁶Ihcuac oteitaque, in achtohque den tiopixcamen opeuque coutzahtzihque: ―¡Xicmasohualtican; mamiqui ipan in cruz! In Pilato oquiniluic: ―Pos, xicuicacan san namehhuan huan xicmictican ipan in cruz, tleca nehhuatl ahmo tlen nicahxiliya itlahtlacol.

⁷Huan in judeahtecos oquinanquilihque: ―Tehhuanten ticpiyahque se tlanahuatili, huan quen ca ipan in totlanahuatil, quipiya tlen miquis, tleca oquihto Iconetzin Dios.

⁸Ic oquicac inin, in Pilato ocachi omomouti.

⁹Huan ocalac oc sepa ipan in palacio, huan otetlahtlani in Jesús: ―Tel, ¿de canin tehhuatl? Huan in Jesús ahmo tlen omonanquilic.

¹⁰Oncan Pilato oteiluic: ―¿Tlen tel, ahmo tinechnanquiliya? ¿Ahmo ticmati quen nehhuatl nicpiya tequihuahyotl ic nimitzmictis ipan in cruz huan nicpiya tequihuahyotl noyojqui ic nimitzcahcahuas?

¹¹Huan Jesús oquinanquililoc: ―Ahmo mopiyas niyan tlen tequihuahyotl ica nehhuatl in tlahmo tlen temacalotoc in Dios. Yeh in ica in aquin onechtemacti moixpa ocachi quipiya hueyi tlahtlacoli huan ahmo tehhuatzin.

¹²Ihcuac inon in Pilato oquitemohuaya quen quichihuas ic tecahcahuas in Jesús. Huan in tequihuahten den judeahtecos oquitzahtzilihque: ―¡In tla ticahcahuas inon tlacatl, ahmo titlasohcau in hueyixtoc romanohteco! San aquin mochihua hueyixtoc, inon itecocolihcau in hueyixtoc romanohteco.

¹³Ic oquicac inin, in Pilato otlatequiuti matequixtican in Jesús. Huan Pilato omotlali canin tlixcomaca huan ica in tlahtoli hebreo yeh canin itoca Gabata, tlen quihtosnequi mach, Tetehtla.

¹⁴Ocatca in tonali achto den pascuahiluitl, cana chicuasin hora sancuel. Oncan in Pilato oquiniluic in judeahtecos: ―¡Nicanca in hueyixtoc den namehhuan!

¹⁵Huan yehhuanten ocoutzahtzihque: ―¡Mamiqui! ¡Mamiqui ipan in cruz! In Pilato oquiniluic: ―¿Tlen tel, cuali nicmictis in hueyixtoc den namehhuan? Huan in achtohque den tiopixcamen oquinanquilihque: ―Tehhuanten ahmo ticpiyahque oc se hueyixtoc, tlahmo san yeh in tequihua romanohteco.

¹⁶Ic inin, in Pilato otetemacti ic matemictican, huan yehhuanten otehuicaque.

¹⁷Jesús oquixohuac momamahtiu in cruz, ic huilohuas in itocahyan Tzontecontla, tlen ica in tlahtoli hebreo itoca Gólgota.

¹⁸Ompa otemasohualtihque mamicohua ipan in cruz, huan inuan ome tlacamen noyojqui oquinmictihque, sehsen ic tenahnahuac oquintelquetzque incruz, huan Jesús tlanepantla omocahualoc.

¹⁹In Pilato otlatequiuti maquitlalican itzoncuac in cruz sequin tlahtoli tlen quihtohua: “Jesús den Nazaret, hueyixtoc den judeahtecos.”

²⁰Miyacten in judeahtecos oquipouque inon tlahcuiloli, tleca in canin otemictihque in Jesús ahmo huehca den altepetl. Huan in tlahcuiloli tlachihchiutli ica hebreo, itlahtol in judeahtecos, huan ica latín, itlahtol in romanohtecos, huan ica griego.

²¹Huan ic inon in achtohque den tiopixcamen den judeahtecos oquiluihque in Pilato: ―Ahmo xiquihcuilo, “hueyixtoc den judeahtecos.” Ocachi cuali xiquihcuilo, “In aquin quihtohua nehhuatl nihueyixtoc den judeahtecos.”

²²Huan in Pilato oquinnanquilic: ―In tlen oniquihcuilo, ijcon mamocahua.

²³Satepa ihcuac in soldados otemasohualtihque in Jesús, oquiololohque in tetlaquen huan oquixelohque. Sehsen omoxeluihque ica in nahue soldados. Oquianque noyojqui in tepampijca huan quen ahmo tlahtzontli, tlachihchiutli san se hueyi tatapahtli,

²⁴in soldados omoluihque se huan oc seya: ―Ahmo tictzomonisque. Ocachi cuali tictlasasque suertes huan ic inon tiquitasque aquinon quihuicas. Ijcon otzonquis in tlahcuiloli tlen quihtohua: “Omoxehxeluihque notlaquen, huan oquitlasque suertes ihtech.” Yeh in tlen oquichiuque in soldados.

²⁵Inahuac in cruz den Jesús ompa ocahcatca in tenana, huan in icniu in tenana, huan María isihuau in Cleofas, huan in María Magdalena.

²⁶Queman Jesús oquitaloc in tenana ihuan ihcatilotica in tetlamachticau in aquin tequin omotlasohtlayaya, oteiluic in tenana: ―Sihuatzintli, mamopiya inin tlacatl quen moconeu.

²⁷Niman oquiluiloc inon tetlamachticau: ―Axan mamopiya inin sihuatzintli quen monana. Huan ic inon oquihuicac ichan inon tetlamachticau.

²⁸Satepa de inin, quen Jesús momautica nochin yotzonquis, huan sa ic matzonquisa in tlen tlahcuiloli, Yehhuatzin omihto: ―Niamiqui.

²⁹Ompa ocatca se xalo tentica den vino xococ. Oncan oquipaltilihque se esponja ipan in vino, huan oquitlalihque ihtech se acatl itoca hisopo huan otecamahuiltihque.

³⁰In Jesús omonic in vino xococ, huan niman omihto: ―Nochin yotzonquis. Oncan omocuanecuiloloc, huan omicohuac.

³¹Yeh in tonali achto den pascuahiluitl, huan in tequihuahmen den judeahtecos ahmo oquinequiyayahque in mijcamen mamocahuacan ipan in cruz ipan in tonali den nesehuilistli, tleca inon tonali den nesehuilistli tequin mahuestic. Yeh in ica oquiluihque in Pilato maquintitlani ic maquinxopostequican in aquin catehque ipan incruz, ocachi ihsiu mamiquican. Huan maquinihcuanican intlacayo de ompa.

³²Oncan in soldados oyahque huan oquixopostejque in achto, huan noyojqui in oc seya in aquin ocatcahque ipan incruz tenahuac in Jesús.

³³Huan ic omopachohque tenahuac in Jesús, oteitaque quen yimicohuatoc, huan ic inon ayacmo otexopostejque.

³⁴Huan seya den soldados oteyeltoquili ica se cohuitl yecateposyo, huan ic inon ohualquis yestli huan atl.