SAN JUAN 19:19-32

¹⁹Condom a Pilato tarang acas poch mayacüch wüx omal a cruz. Aaga poch quiaj apiüng: “Jesús naw Nazaret, minatang nenajiüt ocueaj judíos.”

²⁰Xeyay nipilan judío tateowüw aaga poch quiaj, cos niüng tayacüch wüx cruz Teat Jesús ngome miünquiaj, aton cos aaga poch tarangüch wüx ombeayaran hebreo, griego, at wüx latín.

²¹Pero ajcüwa montangtang miteaats tasajüw a Pilato: ―Nde meyac: “Minatang nenajiüt ocueaj judíos.” Leaw netam meyac: “Nej nepiüng minatang nenajiüt ocueaj judíos,” ―ajüw nej.

²²Quiaj tasaj nejiw a Pilato: ―Leaw lanarang landoj lanarang ―aj nejiw.

²³Ajcüwa soldados wüx landoj mayacüw wüx cruz Teat Jesús, quiaj tayariw apix nej, tambajcüw apiquiw quiriw mayariw noicnoic quiriw. Condom tayariw a najal micamix nej, aag ayaj ngo majiür niüng ambeteay, najüyeran naw cawüx andüy tiüt.

²⁴Quiaj tandeacüw nejeyéjan quiaj, tapiüngüw: ―Ngome apmambajcaats micamix nej, apmasüetiiüts wüx, majüic jane apmayar ―awüw. Atquiaj tajlüy cos landoj lamapiüng tiül Mipoch Teat Dios, niüng apiüng: “Tambajcüw sapix mayariw, tasüetiw majawüw jane apmayar xecamix”, aw. Atquiaj tarangüw soldados.

²⁵Aliw quiaj niüng ajlüy a cruz mimüm nej Teat Jesús, at michiig mimüm nej; at müm María mintaj teat Cleofas, at müm María Magdalena.

²⁶Teat Jesús wüx tajaw mimüm nej, at nop minipilan nej, aaga xeyay tandiüm alquiaj aton, quiaj tasaj mimüm nej: ―Müm, joyaj nganüy apmajlüy atnej micual ―aj.

²⁷Condom quiaj tasaj aaga nop minipilan nej: ―Joyaj teat, nganüy apmajlüy atnej mimüm ―aj. Naw quiaj aaga nop minipilan nej taquiiüb mamb mimüm Teat Jesús andüy aniüng nej atnej majiür mimüm nej.

²⁸Wüx landoj aag ayaj, nej lamajaw meáwan lamapalüch marang. Cos netam majlüy atnej apiüng wüx nej tiül Mipoch Teat Dios, quiaj tapiüng: ―Nind sanganeow yow ―aw.

²⁹Ajlüy quiaj nop xar chipiow nachich vino, quiaj tasocoj tiül noic esponja, aag ayaj atnej walang sap. Ndoj cas tayacüw wüx omal nots narix xiül mipüüig hisopo. Quiaj tayacüw wüx ombeay Teat Jesús.

³⁰Teat Jesús wüx landoj machey aaga nachich vino, quiaj tapiüng: ―Canüy lanambich narang meáwan leawa tiünas narang ―aw. Quiaj manguieer omal nej; tayac miespíritu nej teowix Teat Dios; tanaámb andeow.

³¹Oxep quiaj pascua, y nipilan judío ngo mandiümüw macǘlan wüx cruz mondeow, cos aaga nüt axoodaran quiaj xeyay nangaj. Quiaj tatüniw ocueaj a Pilato majmbajüch oleajiw leaw monlüy wüx cruz para alndom mawüniw tiüt najen.

³²Quiaj tambüw a soldados tajmbajüw oleajiw ajcüw tajmeliw wüx cruz maquiüjpüw Teat Jesús.