San Juan 16:13-23

¹³Ornu cyid Espiriit Yon ni Ñgyoozh, biñ nu rnii de coz rishli, orzeꞌ mi zeꞌ gyoom rishlo der dela coz rishli ni Ñgyoozh. Walab nu gniim nu nac shcab ni ub ziꞌl mi, sinu gniim de coz nu gnii Ñgyoozh lom. Nunu cuic mi nu gad lagy der ni de coz nu gac par lo.

¹⁴Mi zeꞌ gyicy mi nu gyabic mbecy gyel mbecy ne̱, gun de riidz nu ya̱ gne̱e̱ lom, laabaꞌ ndeꞌ gniim lo de ru.

¹⁵Gun dela coz nu rad lagy Ñgyoozh uza̱, niꞌ ziꞌl ya̱ rad lagya̱ de coz zeꞌ. Ndeꞌ nu ya̱ mne̱e̱ lo der nu de riidz nu ne̱e̱ lo Espiriit Yon, laabaꞌ ndeꞌ gniim lo de ru.

¹⁶’Nañ tub miiñ ziꞌl, orzeꞌ wazacaꞌ der ya̱. Tees nañ tub miiñaꞌ ziꞌl, orzeꞌ gzacaꞌ der ya̱ ―nam.

¹⁷Orzeꞌ la be de yu nu rsyaꞌ lom bee nu dey losaꞌy riidz. Orzeꞌ na dey: ―¿Lac yaruu de riidz zeꞌ nu nam nu nañ tub miiñ ziꞌl, orzeꞌ wazacaꞌ den mi; tees nañ tub miiñaꞌ ziꞌl, orzeꞌ bi gzacaꞌ den mi, gun gyam lo Ñgyoozh, uz mi, nam?

¹⁸¿Lac yaruu de riidz zeꞌ nu nañ tub miiñ? Rila wac gyet lag na cuen de coz nu mniim ―na dey.

¹⁹Orzeꞌ Jesuuz guud lagy mi nu rlagy dey cugyiꞌy lom. Orzeꞌ nam rab mi dey: ―Ya̱ bi mne̱e̱ lo der nu nañ tub miiñ ziꞌl orzeꞌ wazac der ya̱. Orzeꞌ nañ tub miiñaꞌ ziꞌl, orzeꞌ bi gzacaꞌ der ya̱, mne̱e̱. ¿A walab riidz nu mne̱e̱ zeꞌ, rgugyiꞌ der lo losaꞌr?

²⁰Ya̱ rishli rne̱e̱ lo der nu de ru gun ru nunu gyicy shni der. Zeꞌ de mbecy ni gyishlombecy cyit ni dey. De ru gyicy shni der tees gruu gyel shni zu lagy zeꞌ ni der nunu gyet lagy der.

²¹Ornu tub biñ mñaa bi rac ye nim nu gaal mi mdoo, orzeꞌ ricy shnim gun bi pshuub or nim. Tees ornu bi bded nu gul mdoo nim, orzeꞌ nit lagy mi nu gutow nim gun cyit nim nu bri mdoo lom gyishlombecy ii.

²²Niꞌ ziꞌl de ru. Ricy shni der na. Tees ya̱ cush cya̱ nu yap güi̱i̱ der par lo. Orzeꞌ gyel ni lardoo der nu gyet lagy ru. Nunu ni tub la mbecy wacgyicy dey nu checa der nu gyet lagy ru.

²³Ornu shuub dzi zeꞌ, orzeꞌ wugyiꞌ gaꞌ der lo̱. ’Ya̱ rishli rne̱e̱ lo der nu Ñgyoozh, uza̱, cuic mi la ziꞌl coz nu cyiñ der lom nu nac ya̱.