San Juan 11:14-34

¹⁴Junni Jesús tuca pato, Lázaro puyaca joe tie.

¹⁵Junto Jesús chiquilachi tenchi pansi joyoe tie Lázaro puyano órate itominlayoeque. Tsanquenan chiquila yaca nanni fe quereilaichunae tie. Tsantisi aman Lázarochica jilaisa! tie.

¹⁶Jesús tsantinan, Tomás chiquilabe pae. Ya Tomachi manca mumun Dídimo jominhe. Yanan Jesube penenamin pejoto, chiquilanan Jesube puyabi pejinilaisa! tie.

¹⁷Junsiri Lázarochica jilaiyoe. Junbi fenasa, Lázaro numa puyacaca menacala jominue. Junpalu ma poleca jominue yaca menanun.

¹⁸Junni Betania pueblo Jerusalén quelote joe. Peman quilon tsansiri joe.

¹⁹Junnan duque israelítala Jerusalenbi nechi Maríabe Mártabechica jaca jominlanue. Cayan puyanunbi, peaconpanaibi jaca jominlanue.

²⁰Junnasa Mártari meránue Jesús janaeque. Junca merasi, yabe tulaibi janue. Maríari yabi puraica jominue.

²¹Junni Marta Jesúchibi fato itsantie: —Miya, nu inte matunan jaca jomanpari, chiquechi cayan puyano itomin jonhoe tie.

²²Tsan josanan chique mirayoe tie nu niyaquetiya Diosibe rocainan, tsanquiniquichunaeque.

²³Junni Jesús Mártabe itsantie: —Nuchi cayan Lázaro mansonhichunae tie.

²⁴Mártanan itsantie: —Chique mirayoe tie. To yucapiyarino mate uyanlanan mansonhilainasa, yanan mansonhino joeque mirayoe tie.

²⁵Junni Jesunan beconan pato itsantie: —Lari sonnasa carin, junsi puyaca junlaca mansonhisa carin, quimin joyoe tie. Labe cayaica junlari puyaca jominnan mansonhilaichunae tie.

²⁶Labe cayaica junlachi tenca numanan puyalaituchunae tie. ¿Junca quereiyun? tie.

²⁷Jesús tsantinan, Mártari itsanque tulanquee: —Miya, chiqueri quereiyoe. Nu jamochi nechi patano jomin Cristo joe. Nu Diosichi Nao joe. Junca quereica talari quereiyoe tie.

²⁸Marta tsantito manjito, yachi miyanbe nosale pato itsantinue: —Miya jae tinue. Nuca jasa tie tinue.

²⁹Junni Marta tsantinunsiri, Maríari wewe manwiruito Jesúchica jae.

³⁰Jesuri jun pueblobi cawica itominhe. Marta tulainuntenan cawiruraminhe.

³¹Junni weyan israelítalari Maríabe peaconpanaibi jaca jominlanue. Junni yala jaca junla quiralaquinue María wewe wiruito, urachi loto jinaminca. Junto menaranun postote warebi jinhinaeque tenhito, yalanan benechi pejinaminlanue.

³²Junni Maríari Jesúchibi fasi, yaca quirato, yachi nedele telenhito, Miya tie. Nu inte ramanpari, chiquilachi cayan puyano itomin jonhoe tie.

³³Maríabe yabe pejaminlabe duque warenaminlae. Junni Jesús yalaca yachi tencabi duque laquiinue.

³⁴Junto itsantie: —¿Puyacaca tile menalaquiyun? tie. Junni ya Maríabe Mártaberi Miya, quirabi pejilaisa! tilatie.