1 Mi vahesia se Zihova gamu pa maṉauru, vahesia sa Nana ṉiniraṉira na linavata.
2 Mi vahesia se Zihova gua sapu padana sa pozana marilaena. Hoqa todoṉo pa kenuna Sa pu vura mae pa tinoa ṉedalana meke hopena.
3 Sa mamalaiṉina e Zihova si avoloṉana la koari na lamana, meke lulusu gua na paka maṉauru lavata pa hebalana.
4 Sa mamalaiṉina e Zihova si koa ia sa ṉiniraṉira; sa mamalaiṉina si koa ia na binaṉara lavata.
5 Sa mamalaiṉina e Zihova koasa raneboṉi, si va mokui sari na huda sida, gua tugo sari na huda sida pa Lebanoni.
6 Va horuhoru guni na tuna bulumakao pinomodi Sa sari na toqere pa Lebanoni, meke horuhoru gunia na tuna bulumakao kokoreo Sa sa toqere pa Hemoni.
7 Sa mamalaiṉina e Zihova si ta avoso meke ta dogoro koasa malarana sa kapi.
8 Sa mamalaiṉina e Zihova si va niu ia sa qega; niu ia Sa sa soloso qega pa Kadesi.
9 Pa mamalaiṉina e Zihova si niu sari na huda oaku, meke rabuti tugo sari na hiqohiqo na muqe, ba pa Nana Zelepade si velavela sari na tie, “Vahesia, vahesia se Zihova!” gua.
