Sam 29:1-9

¹Mi vahesia se Zihova gamu pa maṉauru, vahesia sa Nana ṉiniraṉira na linavata.

²Mi vahesia se Zihova gua sapu padana sa pozana marilaena. Hoqa todoṉo pa kenuna Sa pu vura mae pa tinoa ṉedalana meke hopena.

³Sa mamalaiṉina e Zihova si avoloṉana la koari na lamana, meke lulusu gua na paka maṉauru lavata pa hebalana.

⁴Sa mamalaiṉina e Zihova si koa ia sa ṉiniraṉira; sa mamalaiṉina si koa ia na binaṉara lavata.

⁵Sa mamalaiṉina e Zihova koasa raneboṉi, si va mokui sari na huda sida, gua tugo sari na huda sida pa Lebanoni.

⁶Va horuhoru guni na tuna bulumakao pinomodi Sa sari na toqere pa Lebanoni, meke horuhoru gunia na tuna bulumakao kokoreo Sa sa toqere pa Hemoni.

⁷Sa mamalaiṉina e Zihova si ta avoso meke ta dogoro koasa malarana sa kapi.

⁸Sa mamalaiṉina e Zihova si va niu ia sa qega; niu ia Sa sa soloso qega pa Kadesi.

⁹Pa mamalaiṉina e Zihova si niu sari na huda oaku, meke rabuti tugo sari na hiqohiqo na muqe, ba pa Nana Zelepade si velavela sari na tie, “Vahesia, vahesia se Zihova!” gua.