SALMOS 9:8-16

⁸Toteco quintlajtolsencahuas xitlahuac nochi tlaltini ipan tlaltepactli huan inintlacajhua. Yajaya quintlatzacuiltis sese inijuanti queja quinamiqui ipampa nopa tlajtlacoli tlen quichijtoque.

⁹Nochi tlen pilteicneltzitzi huelis motemachise ipan TOTECO huan yajaya quinmocuitlahuis. Huelis motlatise ipan ya quema tlaijiyohuíaj.

¹⁰Quena, TOTECO, nochi tlen mitzixmatij motemachise ipan ta para tiquinpalehuis, pampa ax quema tiquintlahuelcahuas tlen mitztemohuaj.

¹¹Xihuicaca huan xijpaquilismacaca TOTECO, tlen mosehuía ipan isiyaj yejyectzi nepa ipan Jerusalén huan nochi quinahuatía. Xiquinpohuilica nochi tlacame ipan tlaltepactli tlen yajaya quichijtoc.

¹²TOTECO quintzontlamiltis tlen temictíaj pampa queja nopa quinamiqui quincuepilis. Quinilnamiqui tlen mocuesohuaj, quintlacaquilía quema tlacame tlen tlaijiyohuíaj quitzajtzilíaj para ma quinpalehui.

¹³Xinechtlasojtla, TOTECO. Xiquita queja nitlaijiyohuía ica tlen nechchihuilíaj inijuanti tlen ax quinequij nechitase. Xinechmanahui pampa quinequij nechmictise,

¹⁴huan na nimitzpaquilismacas iniixtla nochi tlacame. Niquinpohuilis nochi tlen mosentilíaj ipan altepetl Jerusalén tlen tinechchihuilijtoc. Nelía nipaquis pampa tinechmaquixtijtos.

¹⁵Mosisinijca tlacame tlen nochi tlaltini huetzise ipan nopa tlacoyoctli tlen inijuantijya quichijque. Quitlatijtoque se tlaquetztli para ma masica sequinoc, pero inijuanti icxicuatacanise.

¹⁶TOTECO quichijtoc para nochi ma quimatica para yajaya xitlahuac tetlajtolsencahua. Yajaya quichihua para ma huetzica ipan tlaquetztli tlen ica ininma quisencajtoque.