1 Naca Xránadxu Benne' Wenná Bea. Le be, le'e zrale xe̱zr la xu. Le be, le'e zrale dxu'a nísadu ca'.
2 Zaj naxechaj beuj, ne da chul-la Le̱'. Ca naca da li, ne da xrlátaje dxenná be'e̱.
3 Cuía lau xi' lau Le̱', ne guzezxe na benne' guledábague̱' Le̱'.
4 Ca naca xesa ca' chee̱' bulusení na xe̱zr la xu. Dxelé'e xe̱zr la xu na, ne dxezrize na.
5 Dxelexuna xi'a ca' ca da zixre chee̱ bézudau' lau Xránadxu, lau Xrana bénneache zaj zre̱'e̱ du gabí'i xe̱zr la xu.
6 Dxulé'e xabáa ca naca da xrlátaje chee̱', na' dxelelé'e bénneache dute̱ xe̱zr la xu ca naca xel-la' szren chee̱'.
7 Dxal-la' xelexedué'e xúgute̱ benne' ca' dxulucá'ana szrene̱' bedáu' xiaj xaga ca', benne' ca' dxulucá'ana szren cuine̱' ca zaj naca bedáu' xiaj xaga ca'. Xúgute̱ dios chee̱ bénneache ca' dxal-la' xuluzú zribe na lau Xránadxu Dios.
8 Belén benne' zaj zre̱'e̱ Sión, na' gulebene̱'. Gulebé benne' zaj zre̱'e̱ Judá, ne̱ chee̱ da guchi'u Lue', Xran.
9 Szrente̱ nacu' Lue', Xran, lawe' dute̱ xe̱zr la xu. Szrendxa nacu' Lue' ca xúgute̱ dios chee̱ bénneache.
10 Le'e, núlale nazrí'ile Xránadxu, le cuide da cale̱la. Le̱' dxuxúe̱' bénne'du zaj xu'e̱ bénneache chee̱'. Dxuselé̱' le̱' lu na' benne' dxelebéaj xíchaje̱' Dios.
