SALMOS 90:8-12

⁸Totlajtlacolhua huan totlaixpanolhua tlanempa nestoc moixpa.

⁹Yeca nochi tonali huan nochi xihuitl tijpanoj huejhueyi tlaohuijcayotl, tlen ta titechtitlanilía ica mohueyi cualancayo.

¹⁰San titechcahuilía titlacame ma tiitztoca setenta xihuitl. Huan tlen quentzi más tejtetique san tiquincahuilía ma itztoca ochenta xihuitl. Pero ipan nochi nopa xihuitl san tijpanoj tlaohuijcayotl huan cuesoli, pampa nochi nopa xihuitl san panotiquisa huan tojuanti san tiixpolijtehuaj.

¹¹¿Ajqueya quimachilía nochi tlen tihuelis tijchihuas quema ticualani? ¿Ajqueya tlen tojuanti mitzimacasi queja quinamiqui?

¹²Ax miyac tonali tijpiyaj, huajca xitechnextili quejatza ma tijchihuaca para ax timotonalpolose, huan para ma tijpiyaca tlalnamiquistli ipan toyolo nochi tonali.