1 X̱ana' Dios, góḻteza' che yeḻa' ži'i ḻaže' chio'. Wzenla' to kwe' to kwe' ẕa'sóto' ka' nako' ḻi ḻaže'.
2 Nnezla' sóateze yeḻa' ži'i ḻaže' chio', na' to chi'ize zoa yeḻa' ḻi ḻaže' chio', kan zoakze ya'abá.
3 Le' wnnó': “Bena' to diža' ḻen bennen' wžía'. Bchebe ḻaža'a da' gona' che Dabí, wen žin chia'.
4 Goža'-ne': gona' ga sóatezegak ẕa'só' ka', na' gona' ga nna biá'tezgakbe' ḻo wlazo' le'.”
5 Benne' ka' nníta'gake' ya'abá žoe ḻáwgake' Le' ni'a che da' ẕente da' žono', na' ni'a che yeḻa' ḻi ḻaže' chio', X̱ana' Dios.
6 Bi zoa no benne' ya'abá, bennen' nake' ka nakkzo' Le', X̱ana' Dios. Bi zoa no benne' nake' benne' ẕente ka nako' Le'.
7 Benne' ka' zej nnite'e ya'abá žápegake' Dios ba la'ne na' yógo'te benne' chie' ka' ẕžébegake' Ḻe'.
8 X̱anto' Dios, ẕnna bi'o benne' zante, benne' žjake' ḻo wdiḻe, nníta'gake' ya'abá. Bi zoa no benne' nake' ka nako' Le', X̱ana' Dios. Nako' Benne' wáḻeḻe'e, na' nakkzo' ḻi ḻaže'.
9 Ẕnna bi'o nisdo' dan' ẕgo'nen. Kate' ẕgo'nḻe'en Le' ẕbek žion'.
10 Blej bchochjo' benne' Egipto ka', na' bgá'ngake' ka to da' gat. Besḻaso' benne' ka' bi ẕḻé'egekle' Le' chawe' ḻen no'o wáḻeḻe'e.
11 Chio' Le' nak ya'abá, na' chio' Le' nak yežlyó. Beno' yežlyó nga, na' da' ka' nníta'gaken ḻawlen.
12 Beno' da' de cheḻá'a gan za' be' zag, na' da' de cheḻá'a gan ẕde wbíž byo' zag ka'. Ḻo yeḻa' žebele žoḻgak Ya'a Tabor, na' Ya'a Hermón chio' Le'.
13 Benne' wáḻeḻe'e nako' Le', na' ẕenḻe'e nak yeḻa' wak chio'.
14 Ḻo da' chawe', na' ḻo da' ḻi ḻaže' ẕnna bi'o. Ḻo yeḻa' ži'i ḻaže' na' ḻo da' ḻi ḻaže' žono' yógo'te.
