7 Mocualancayo nechtaijyohuiltía chicahuac huan talojtzitzi nechtatzintanhuetziltía más.
8 Tijchijtoc para noteixmatcahua ma nechtahuelcahuaca huan ma nechijiyaca. Eltoc quej niitztoc ipan se tatzacti huan amo hueli niquisa.
9 Ayecmo hueli nitachiya pampa tahuel nimochoquilijtoc. Mojmosta nimitztajtanía motapalehuil, huan nimomatanana quema nimotatajtía ica ta, TOTECO, para techtasojta.
10 Pero nijmachilía para, quena, nimiquis nimantzi, huan ¿taya ipati elis para na nopa tiochicahualnescayot cati tijchihuas quema ya nimictoc? ¡Amo teno! ¿Huelis nimitzpaquilismacas quema ya nimictos?
11 Se mijcatzi cati ya quitalpachojtoque amo huelis tepohuilis para tijpiya hueyi taicnelili. Amo huelis tepohuilis para titemachti.
12 Nepa campa tzintayohua amo huelise tepohuilise nopa huejhueyi tiochicahualnescayot cati tijchihua. Mijcatzitzi itztoque ipan se tali campa ayecmo teno quielnamiquij, huan amo huelis mitzelnamiquise para san ta tixitahuac.
