SALMOS 78:41-72

⁴¹Ajachica quiyejyecojque, huan ica ya nopa mochihuilijque para Toteco ma quintzontlamilti. Niyon ax quicahuilijque para Toteco ma quintiochihua, yajaya tlen ininDios israelitame huan tlen Tlatzejtzeloltic.

⁴²Quiilcajque ihueyi chicahualis huan iteicnelijcayo. Huan quiilcajque quejatza quinmanahui ininmaco inincualancaitacahua.

⁴³Quiilcajque quejatza Toteco quititlanqui tlatzacuiltili ipan tlali Zoán huan ipan tlali Egipto.

⁴⁴Quiilcajque quejatza quicuepqui estli nopa atl huan ayoc aca huelqui quiic.

⁴⁵Quiilcajque quejatza quintitlanqui tlahuel miyac sayolime hasta quitemitijque nopa tlali. Quiilcajque quejatza nopa tamasolime quitemitijque nopa tlali Egipto.

⁴⁶Toteco quintitlanqui ocuilime huan chapolime para ma quicuaca inintlatochui huan ininpixquilis.

⁴⁷Ica tesihuitl quintzontlamilti ininxocomecamil huan ininhiguera mil.

⁴⁸Ininhuacaxhua mijque ipan potrero pampa Toteco Dios quinmajcahuili tesihuitl tlen tlahuel huejhueyi. Huan ininborregojhua mijque ica tlapetlancayotl.

⁴⁹Quena, Toteco tlahuel cualanqui ica inijuanti, huan yeca quintitlanili tlacuajcualocayotl huan tlaohuijcayotl. Huan quintitlanili se pamitl tlen elhuicac ehuani tlen tetzontlamiltíaj.

⁵⁰Cualanqui nelchicahuac huan ax quimanahui niyon se Egipto ejquetl. San quintitlanili tlatzacuiltili huan huejhueyi cocolistli.

⁵¹Teipa Toteco quinmicti nopa achtohui ehuani ipan sesen familia tlen tlali Egipto. Quena, quinmicti tlen elqui iniachtohui fuerza quema pejque quinpiyaj coneme.

⁵²Pero quinquixti itlacajhua queja elisquíaj pilborregojtzitzi, huan quinyacanqui ica yejyectzi ipan nopa huactoc tlali.

⁵³Quinyacanqui ica miyac temachili para ma ax majmahuica. Pero nopa hueyi atl quinatzonpolihuilti inincualancaitacahua.

⁵⁴Huan quinhuicac hasta campa inepantipa nopa tlali tlen tlatzejtzeloltic. Nopa tlali tlen quipiya miyac tepetini tlen Toteco quintlanili para inijuanti.

⁵⁵Iniixtla quintotocac nopa tlacame tlen itztoyaj ipan nopa tlali. Teipa quiyejyeco huan quinmajmacac nopa huejhueyi familias tlen israelitame para iniaxca. Huan nopano quincajqui ma itztoca.

⁵⁶Pero yonque quinchihuili ya nopa, inijuanti quisenhuiquilijque quiyejyecohuaj huan quicualancamacaj Toteco Tlen Más Hueyi. Huan ax quinejque quitlepanitase itlajtol.

⁵⁷Yeca mocuepque para ax calaquise ipan nopa tlali tlatencahuali huan quicamaijixnamijque san se queja inintatahua quichijque. Huan queja se cuatlamintli tlen huijcoltic ax yahui xitlahuac quema quimajcahuaj, inijuanti nojquiya ax yajque xitlahuac para quichihuase ipaquilis Toteco.

⁵⁸Quicualancamacaque Toteco pampa mochijchihuilijque teteyome huan tlaixpamitl para quinhueyichihuase ininteteyohua.

⁵⁹Pero quema Toteco Dios quiitac ya ni, tlahuel cualanqui huan pejqui quincualancaita.

⁶⁰Huan quitlahuelcajqui itiopa tlen eltoya ipan altepetl Silo, nopa yoyon cali campa ipan itztoya tlen quichijtoya nopano ininhuaya itlacajhua.

⁶¹Huan Toteco quincahuili inincualancaitacahua ma quihuicaca icaxa tlen quinpixtoya itlanahuatilhua. Elqui queja quincuilijque ininchicahualis huan ininyejyejca.

⁶²Nojquiya quintemactili itlacajhua ininmaco inincualancaitacahua para ma quinmictica ica machete, pampa yajaya tlahuel cualantoya ininhuaya.

⁶³Inintelpocahua quintlatijque, huan iniichpocahua quintzontlamiltijque, niyon ax quiaxilijque para monamictise huan huicase ipan nenamictili.

⁶⁴Quintzontlamiltijque nopa totajtzitzi ica machete huan ininsihuajhua nojquiya mijque nimantzi, niyon ax quinchoquilijque ininhuehuejhua.

⁶⁵Huajca Toteco motlalanqui queja quema se acajya cochi huan mehua, o queja se tetica tlacatl tlen tlahuel tzajtzi chicahuac pampa ihuintitoc.

⁶⁶Huan Toteco quinixtacahui quintehui icualancaitacahua. Quena, quinhuejcamajcajqui huan quintitlanqui ipan se lugar campa quipanose pinahualistli para nochipa.

⁶⁷Pero Toteco quintlahuelcajqui nopa huejhueyi familias tlen hualajqui tlen José huan Efraín.

⁶⁸San quintlapejpeni ihueyi familia Judá, huan nopa tepetl Sion tlen yajaya tlahuel quiicneliyaya.

⁶⁹Huan nopano quichijchijqui itiopa tlen yejyectzi huan temachtli, huan tlen huejcahuasquía para nochipa queja huejcahua elhuicactli huan tlaltepactli.

⁷⁰Quitlapejpeni itlatequipanojca, David, quema quinmocuitlahuiyaya borregojme,

⁷¹quema yahuiyaya inintepotzco nopa tenan borregojme tlen quinpiyayayaj ininconehua, huan quinhualicayaya para ma quinmocuitlahui. Huan Toteco quichijqui David ma quinyacana itlacajhua, nopa israelitame tlen quintlapejpenijtoya para iaxcahua.

⁷²Huan quena, David quinmocuitlahui itlacajhua Toteco ica nochi ichicahualis huan ica nochi iyolo.