SALMOS 72:3-18

³Xijchihua para nochi tlacame ipan ni tlali ma paquica pampa nopa tlanahuatijquetl quichihua tlen xitlahuac, hasta eltoc queja nochi cuatini tlen onca ipan tepetini huan ipan tlachiquili nojquiya paquij huan temacaj cuali inintlajca.

⁴Yajaya quinmanahuis tlen itztoque ipan cuesoli huan tlen ax tleno quipiyaj. Nojquiya ma quintlatzacuilti nopa tlacame tlen tetlaijiyohuiltíaj.

⁵Huan tlen teicneltzitzi huan ax tleno quipiyaj mitzimacasise mitzixpanose nochi tonali quema noja eltos tonati huan metztli. ¡Quena, ma mitzhueyimatica para nochipa!

⁶Huan nochi altepetini ipan itlanahuatilis nocone ma eli yejyectzi huan temachtli, queja nopa atl tlen huetzi para ma chamanica cuatini, o queja nopa ajhuechtli tlen quixolonía nopa tlali.

⁷Huan nochi tlacame tlen itztoque xitlahuaque huan cuajcualme, ma itztoca ica yejyectzi quema yajaya tlanahuatis. Quema yajaya tlanahuatis, oncas miyac tlasehuilistli hasta itlamiya tonali.

⁸Itlanahuatilis nocone ma ajsi hasta campa pehua huan hasta campa ontlami nopa hueyi atl. Ma ajsi tlen campa nopa hueyi atl Éufrates hasta campa ontlantoc tlaltepactli.

⁹Nochi tlacame tlen itztose ipan huactoc tlali mohuijtzomase iixpa, huan icualancaitacahua motlancuaquetzase iixpa hasta quipipitzose tlaltejpoctli.

¹⁰Nochi nopa tlanahuatiani tlen itztoque itejteno nopa hueyi atl tlen itoca Mediterráneo, huan nopa tlanahuatiani tlen tlali Tarsis huan nopa tlanahuatiani tlen tlali Sabá huan Seba quihualiquilise miyac regalos.

¹¹Quena, nochi tlanahuatiani tlen campa hueli tlaltini motlancuaquetzase, huan moixtlapachose iixpa huan quitequipanose.

¹²Yajaya quinmanahuis nopa teicneltzitzi huan tlen ax tleno quipiyaj quema quitlajtlanise tlapalehuili. Pampa inijuanti ax quipiyaj ajqueya quinpalehuis.

¹³Yajaya quintlasojtlas tlen ax quipiyaj chicahualistli huan tlen teicneltzitzi, huan quinmanahuis.

¹⁴Quinmanahuis para ax quintlaijiyohuiltise huan para ax quintehuise. Pampa quiitas para ininyolis tlahuel miyac ipati iixpa.

¹⁵Huan quema noja itztos nopa tlanahuatijquetl, quimacase miyac oro tlen onca ipan tlali Sabá. Huan itlacajhua quisenhuiquilijtose momaijtojtose ica Toteco huan mojmostla quitlascamatise.

¹⁶Ma oncas miyac trigo ipan nochi nopa tlali, huan hasta nopa cuatini tlen onca ipan tepetini ma temacase inintlajca queja temacaj nopa cuatini tlen onca ipan tlali Líbano. Huan ma onca miyac tlacame ipan altepetini, queja imiyaca nopa xihuitini tlen onca ipan cuatitlamitl.

¹⁷Nochi ma quihueyimatica nopa tlanahuatijquetl para nochipa, huan itequihuejcayo ma huejcahua queja huejcahuas tonati. Nochi ma quiselica tlatiochihualistli ipampa ya. Huan tlacame ipan nochi tlaltini ma quipaquilismacaca, huan ma quiijtoca para Toteco quintiochijtoc.

¹⁸Ma tijhueyichihuaca TOTECO Dios tlen toDios tiisraelitame, pampa san yajaya hueli quichihua huejhueyi tlamantli.