SALMOS 68:8-13

⁸nopa tlali mojmolini huan huetzqui atl tlen elhuicactli moixpa. Nopa tepetl Sinaí mojmolini moixpa ta tlen titoTeco tiisraelitame.

⁹Toteco Dios, ta tijchijqui ma huetzi miyac atl ipan ni tlali tlen tiquinmacac motlacajhua. Quena, ica nopa atl tiquinfuerzajmacac tlen moaxcahua quema tlahuel tlaxicojtoyaj.

¹⁰Yeca motlacajhua mocajque nica ipan ni tlali. Huan ta ica moteicnelijcayo tiquinmacac nopa teicneltzitzi nochi tlen monequiyaya para ica mopanoltise.

¹¹Toteco quiijto para ya tlatlantoya, huan miyac tlacame tzajtzique chicahuac para tepohuilise tlen panotoc. Quiijtojque:

¹²“Cholojtejque nopa soldados tlen hualajtoyaj para techtzontlamiltise.” Quena, ama nopa israelita sihuame momajmacaj nochi tlamantli tlen quicajtejque nopa soldados.

¹³Xiquitaca, yonque quinmocuitlahuiyayaj borregojme, ama nopa sihuame hasta petlanij ica oro huan plata. Nochi inintlacayo quitlamitzactoque ica tlamantzitzi tlen yejyectzitzi queja se paloma quitlamitzacua itlacayo ica ieltlapal.