SALMOS 48:9-13

⁹Toteco Dios, quema tiitztoque ipan motiopa, tiquilnamiquij huan timoyolilhuíaj quejatza titechicnelía.

¹⁰Toteco, campa hueli tlacame mitzpaquilismacaj, pampa quicactoque quejatza mohueyitilis. Quicactoque hasta campa ontlami tlaltepactli. Huan quimatij para ica mohueyi chicahualis titetlajtolsencahua xitlahuac.

¹¹Huajca ma paquica nopa tlacame ipan tepetl Sion. Ma huitonica ica paquilistli nochi tlen ehuaj ipan altepetini tlen tlali Judá pampa cuali huan xitlahuac titetlajtolsencahua.

¹²Nochi imojuanti tlen initlacajhua Toteco Dios, xiyaca xijyahualotij nopa altepetl Jerusalén, huan xijpohuaca quesqui tepancali huejhueyi quipiya campa soldados tlamocuitlahuíaj.

¹³Xijtlachilitij nopa hueyi ichaj nopa tlanahuatijquetl, huan ximomacaca cuenta quejatza tlatzajtzactoque huan quiyejyectlalijtoque, para queja nopa huelis inquinpohuilijtiyase imoteipa ixhuihua.