SALMOS 45:10-14

¹⁰Xijtlacaquili ichpocatl. Quena, xijtlacaquili cuali, nocone, tlen nimitzilhuis: Ayoc xiquintoquili motatahua, moicnihua huan nochi tlen timomajtoya tijchihua.

¹¹Nopa tlanahuatijquetl tlahuel mitzcualita, huan nelía paqui ica moyejyejca. Huajca monequi tijneltoquilis pampa ama ya moTeco.

¹²Hualase mitzpaxaloquij iichpocahua nopa tlanahuatijquetl tlen altepetl Tiro. Quena, tlen más tominpixtoque ipan nopa altepetl hualase huan mitzmacase regalos. Ya ni quichihuase pampa quinequise ximohuampochihua ininhuaya.

¹³Nopa ichpoca monamictijquetl mocualtlalía ipan ichaj ica tlen más yejyectzi. Yajaya iichpoca se tlanahuatijquetl huan ama mocuilis ne tlanahuatijquetl tlen hueyi. Onpano yejyectzi nopa ichpocatl ica iyoyo tlen nelcuajcualtzi tlen tlajtzontli ica oro.

¹⁴Quena, yejyectzi quiyoyontijtoque ica iyoyo tlajtzontli huan ama quihuicase iixpa nopa tlanahuatijquetl tlen ihuaya monamictis. Itepotzco yase iichpocapoyohua tlen quinnotztoc.