SALMOS 44:5-11

⁵Quena, ica motlapalehuil tiquintlanise tocualancaitacahua. Huan ica mochicahualis ininpan timoquejquetzase tlen techtehuíaj.

⁶Pampa ax timotemachíaj ipan tocuahuitol huan tomachete para ma timomanahuica huan titlatlanise.

⁷Eltoc ta, Toteco, tlen tijchihua ma tiquintlanica tocualancaitacahua. Ta tiquinpinahualtijtoc nochi tlen techcocolíaj.

⁸Mojmostla timitzpaquilismacase Toteco Dios. Huan timitzhueyichihuase ica huicatl para nochipa.

⁹Pero amantzi eltoc queja titechtlahuelcajtoc huan titechpinahualtijtoc. Niyon ayoc tinemi ininhuaya tosoldados quema tiontlatehuíaj.

¹⁰Tijchijqui ma ticholoca iniixpa tocualancaitacahua. Quena, inijuanti tlen techcocolíaj techtlaxtequilíaj huan quihuicaj nochi tlen quinequij.

¹¹Titechtemactilijtoc queja tipilborregojtzitzi tlen san quichiyaj para quinhuicase campa quinmictise. Huan titechsemantoc campa hueli ipan sequinoc tlaltini campa quinhueyichihuaj teteyome.