2 Quiquiquimi mana rispitashojcunatapis jitarirayqui. Jäpa runacunata illgächirayqui. Chaymannami awilöcunata tiyachirayqui.
3 Manami sablinwanchu cay pachataga guechuran. Ni callpanwanpischu binsiran. Chaypa ruquenga gammi munayniquiwan binsirayqui. Alli car yanapaptiquimi binsiran. Unay caj castäcunata cuyashpayquimi munayniquiwan yanaparayqui.
4 Raynillä, Tayta Diosnillä, acrashayqui runacunataga gammi yanaparayqui binsinanpaj.
5 Yanapämaptiquimi binsishcä chiquimajcunata. Magamajcunatapis illgächirä.
6 Binsinäpäga noga manami yäracömanchu lëchäman. Sablëpis manami salbamanmanchu.
7 Gam yanapämaptiquimi conträcunata binsishcä. Gammi pengayman churashcanqui chiquimajcunataga.
8 Imaypis gamtaga alabaycäshayquimi Tayta Dios. Imaypis agradësicuycäshayquimi. Selah
9 Canan ichanga ñïgamashcanquina. Pengaychönami cachaycamashcanqui. Suldäröcunatapis manami yanapanquinachu.
10 Chiquimajcunata manchacunäpänami camacächishcanqui. Chiquimajcunaga ima-aycäcunatapis guechumanmi. Munashan cajtami apacun.
11 Nogacunataga gastupaj caj uyshano canäpänami cachaycamashcanqui. Machiypa machir gargaramashcanqui mana rispitashoj runacunaman.
12 Acrashayqui runacunataga barätullami ranticuycushcanqui. Manami gänashcanquipischu.
