Salmos 44:2-12

²Quiquiquimi mana rispitashojcunatapis jitarirayqui. Jäpa runacunata illgächirayqui. Chaymannami awilöcunata tiyachirayqui.

³Manami sablinwanchu cay pachataga guechuran. Ni callpanwanpischu binsiran. Chaypa ruquenga gammi munayniquiwan binsirayqui. Alli car yanapaptiquimi binsiran. Unay caj castäcunata cuyashpayquimi munayniquiwan yanaparayqui.

⁴Raynillä, Tayta Diosnillä, acrashayqui runacunataga gammi yanaparayqui binsinanpaj.

⁵Yanapämaptiquimi binsishcä chiquimajcunata. Magamajcunatapis illgächirä.

⁶Binsinäpäga noga manami yäracömanchu lëchäman. Sablëpis manami salbamanmanchu.

⁷Gam yanapämaptiquimi conträcunata binsishcä. Gammi pengayman churashcanqui chiquimajcunataga.

⁸Imaypis gamtaga alabaycäshayquimi Tayta Dios. Imaypis agradësicuycäshayquimi. Selah

⁹Canan ichanga ñïgamashcanquina. Pengaychönami cachaycamashcanqui. Suldäröcunatapis manami yanapanquinachu.

¹⁰Chiquimajcunata manchacunäpänami camacächishcanqui. Chiquimajcunaga ima-aycäcunatapis guechumanmi. Munashan cajtami apacun.

¹¹Nogacunataga gastupaj caj uyshano canäpänami cachaycamashcanqui. Machiypa machir gargaramashcanqui mana rispitashoj runacunaman.

¹²Acrashayqui runacunataga barätullami ranticuycushcanqui. Manami gänashcanquipischu.