SALMOS 40:8-14

⁸¡NoTeco Dios! Nechpactía nijchihuas mopaquilis, huan motlamachtil nijhuica ipan noyolo.”

⁹Tlamiyacapa iniixtla motlacajhua niteyolmelajtoc para ta, TOTECO, tiquinchihua tlacame xitlahuaque moixpa. Cuali tijmati para ax san nicajcoctoc tlen nijmati.

¹⁰Ax nijtlatijtoc nopa cuali tlajtoli ipan noyolo para axaca niquilhuis. Nochi tlacame niquinyolmelahua para ta tiquinmaquixtis. Nochipa nitematiltis para ta nelía titemachtli huan titepalehuía. Nepa tlamiyacapa nitepohuilis para titetlasojtla huan ax timoyolpatla.

¹¹TOTECO, nijmati ax quema tijcahuas tinechtlasojtlas. Nimochiya ipan moteicnelijcayo, pampa ta nochipa tinechmocuitlahuis.

¹²Miyac cuesoli nijpiya campa hueli. Ax hueli nijpohua nochi. Notlajtlacolhua nechtlantoc huan nichoca hasta ax hueli nitlachiya. Notlajtlacolhua nelmiyac hasta quipano imiyaca notzoncal. Tlantinemi noyolo huan nochicahualis.

¹³TOTECO, xinechmanahuiqui. Quena TOTECO, ximoisihuilti huan xinechpalehuiqui.

¹⁴Ma mopinahualtica huan ma mocuapoloca tlen quinequij nechtzontlamiltise. Xiquintojtocatinemi tlen nechcocolíaj huan tlahuel xiquinpinahualti.