SALMOS 37:4-11

⁴Ximohuampochihua ihuaya TOTECO, huan yajaya mitzmacas tlen moyolo quinequi.

⁵Xijcahuili TOTECO ma mitznextili campa tinemis. Ximotemachi ipan ya, huan yajaya quichihuas.

⁶Quipannextis tlen xitlahuac tijchihua. Quena, quichihuas para nochi ma quiitaca motlalnamiquilis queja nochi quiitaj quema tlahuía tonati ipan tlajcotona.

⁷Xijpiya moyolo quema tiitztoc iixpa TOTECO. Amo ximolini. Xijchiya para yajaya quichihuas tlen moilhuijtoc quichihuas. Amo xicualani ininhuaya tlen quipiyaj nochi tlen quinequij ama. Amo xiquinchihuili cuenta inijuanti tlen quichijtinemij sesen tlamantli tlen fiero quisencajtoque.

⁸Amo ximocualancamaca. Xijtlalcahui cualantli, pampa cualantli noja más hueyi mochihuas huan mitzcocos.

⁹TOTECO quintzontlamiltis tlen mosisiníaj, pero tlen motemachíaj ipan ya quintiochihuas huan moaxcatise nopa tlali.

¹⁰Ayoc huejcahuas noja itztose ax cuajcualme, teipa yonque titlachiyas campa itztoyaj, ax quema sampa tiquinpantis.

¹¹Pero tlacame tlen moicnonequij iixpa Toteco itztose ipan nopa cuali tlali huan tlahuel paquise, pampa yajaya quintiochihuas hasta mocahuas.