SALMOS 34:5-20

⁵Sequinoc tlen motemachíaj ipan Toteco ixcahuanij ica paquilistli nojquiya, ipampa tlen yajaya quinchihuilijtoc. Ax quema pinahuase.

⁶Yonque nipilteicneltzi, nijtzajtzili TOTECO, huan yajaya nechmaquixti ica nochi tlamantli tlen nechcuesohuayaya.

⁷Ielhuicac ejca TOTECO quinmocuitlahuía nochi tlen quiimacasij TOTECO, huan yajaya quinmanahuía.

⁸Xijyejyecoca TOTECO huan inquiitase para melahuac cuali iyolo tohuaya. Hueyi paquilistli quipiyaj nochi tlacame tlen ipan ya motemachíaj.

⁹Nochi imojuanti tlen iniaxcahua TOTECO, xiquimacasica, pampa nochi tlen quitlepanitaj ax tleno quinpolohua.

¹⁰Nopa tecuanime tlen más quipiyaj chicahualistli quemantzi mayantinemij huan ax quipantíaj tlen quicuase, pero tlacame tlen quitemohuaj TOTECO quipiyase nochi tlen cuali.

¹¹Xihualaca noconehua, huan xinechtlacaquilica, huan nimechmachtis quejatza monequi inquitlepanitase TOTECO, huan inquiimacasise inquiixpanose.

¹²¿Tijnequi tiitztos ica yejyectzi? ¿Tijnequi tihuejcahuas ipan ni tlaltepactli, huan tiquitas tlen cuali?

¹³Monequi xijmocuitlahuis monenepil para ax tiquinmahuispolos sequinoc ica istlacatili.

¹⁴Ximoiyocatlali ica tlen ax cuali, huan xijchihua san tlen xitlahuac. Xijchihuaca tlen inhuelij para ma oncas tlasejseltili ininhuaya nochi tlacame. Quena, ya nopa xijtemoca ica nochi imoyolo.

¹⁵TOTECO quintlachilía tlen nemij xitlahuac iixpa, huan san quichiya para quinmacas tlen quitlajtlanise.

¹⁶Pero TOTECO sencualantoc ica inijuanti tlen quichihuaj tlen fiero. Quintzontlamiltis para ma axaca quinilnamiquis ipan ni tlaltepactli.

¹⁷Quema tlacame tlen itztoque xitlahuaque iixpa TOTECO quitzajtzilíaj, yajaya quintlacaquilía. Huan quinmanahuía tlen nochi inincuesolhua.

¹⁸TOTECO itztoc ininnechca tlacame tlen mocuesohuaj. Huan quinmaquixtía tlen mocuesohuaj ica inintlajtlacolhua.

¹⁹Se tlacatl tlen itztoc xitlahuac iixpa TOTECO quipiya miyac cuesoli, pero TOTECO quimanahuía ica nochi tlen ipanti.

²⁰Pampa TOTECO quimocuitlahuía para ax postequis niyon se iomiyo.