3 Xijsencahuaca se huicatl catli yancuic, huan xijhuicatica TOTECO. Xitlatzotzonaca cuali, huan xitzajtzica ica paquilistli.
4 Pampa nelía xitlahuac nochi catli quiijtohua TOTECO. Nochi catli quichihua tenextilía para temachtli.
5 TOTECO quipactía nochi catli xitlahuac huan catli melahuac. Nochi catli itztoque ipan tlaltipactli quiselíaj itlaicnelilis TOTECO.
6 TOTECO tlanahuati ma onca ilhuicactli huan mochijqui. San camanaltic huan mochijqui metztli, tonati huan nochi sitlalime.
7 Yaya quisansejcotili nochi atl catli eltoc ipan hueyi atl. Quiajojqui nopa atl campa más tlahuejcatla.
8 Nochi antlaltipac ehuani xijhueyitlepanitaca TOTECO. Quena, nochi catli anitztoque ipan ni tlaltipactli xiquimacasica.
9 Pampa nochi catli yaya quiijto, ya nopa mochijqui. Huan catli yaya tlanahuati ma eli, ya nopa monexti.
10 TOTECO quinsosolhuilía inintlalnamiquilis masehualme ipan campa hueli tlalme para amo ma quichihuaca catli fiero moilhuijtoque. San tlailpitzas huan quincuapolos tlalme para amo huelise quichihuase catli fiero quisencajtoque quichihuase.
11 Pero catli TOTECO moilhuijtoc quichihuas amo quema mopatlas. Catli ya quinequi, ya nopa elis para nochipa.
12 Paquij masehualme ipan nopa tlali catli motemachíaj ipan TOTECO. Quena, nelía paquij nopa masehualme catli TOTECO quintlapejpenijtoc para iaxcahua.
13 TOTECO catli itztoc nepa ilhuicac techhualtlachilijtoc nochi timasehualme.
14 Hasta nepa ipan ilhuicac TOTECO techtlachilijtoc catli tiitztoque ipan ni tlaltipactli.
15 Yaya TOTECO catli techyolchijchijqui nochi titlaltipac ehuani huan techtlachilía nochi catli tijchijtinemij.
16 Se hueyi tlanahuatijquetl amo tlatlani pampa quinpiya miyac isoldados. Niyon se soldado catli motemaca amo tlatlani pampa quipiya miyac fuerza.
17 Amo ximotemachi ipan se cahuayo para mitzmanahuis masque nelía tetic. San ica ifuerza amo hueli temanahuía.
18 Pero TOTECO, quena, yaya nochipa techtlachilijtoc tojuanti catli tiquimacasij tiquixpanose. Techmocuitlahuía catli timochiyaj ipan itlaicnelilis.
