SALMOS 33:1-21

¹Xihuicaca ica paquilistli para TOTECO imojuanti tlen initztoque xitlahuac iixpa. Nelía yejyectzi para nochi tojuanti tlen tijchijtinemij tlen cuali ma tijhueyichihuaca.

²Xitlatzotzonaca ica arpa para xijhueyichihuaca, TOTECO. Xihuicaca iixpa huan xijpaquilismacaca ica tlatzotzonali tlen nesi queja guitarra.

³Xijsencahuaca se huicatl tlen yancuic, huan xijhuicatica TOTECO. Xitlatzotzonaca cuali, huan xitzajtzica ica paquilistli.

⁴Pampa nelía xitlahuac nochi tlen quiijtohua TOTECO. Nochi tlen quichihua tenextilía para temachtli.

⁵TOTECO quipactía nochi tlen xitlahuac huan tlen melahuac. Nochi tlen itztoque ipan tlaltepactli quiselíaj iteicnelilis TOTECO.

⁶TOTECO tlanahuati ma onca elhuicactli huan mochijqui. San camatqui huan mochijqui metztli, tonati huan nochi sitlalime.

⁷Yajaya quisejcotili nochi atl tlen eltoc ipan hueyi atl. Quiajcojqui nopa atl campa más tlahuejcatla.

⁸Nochi intlaltepac ehuani xijhueyitlepanitaca TOTECO. Quena, nochi tlen initztoque ipan ni tlaltepactli xiquimacasica.

⁹Pampa nochi tlen yajaya quiijto, ya nopa mochijqui. Huan tlen yajaya tlanahuati ma eli, ya nopa elqui.

¹⁰TOTECO quinxolehuilía inintlalnamiquilis tlacame ipan campa hueli tlaltini para ma ax quichihuaca tlen fiero moilhuijtoque. San tlailpitzas huan quincuapolos tlaltini para ax huelise quichihuase tlen fiero quisencajtoque quichihuase.

¹¹Pero tlen TOTECO moilhuijtoc quichihuas ax quema mopatlas. Tlen ya quinequi, ya nopa elis para nochipa.

¹²Paquij tlacame ipan nopa tlali tlen motemachíaj ipan TOTECO. Quena, nelía paquij nopa tlacame tlen TOTECO quintlapejpenijtoc para iaxcahua.

¹³TOTECO tlen itztoc nepa elhuicac techhualtlachilijtoc nochi titlacame.

¹⁴Hasta nepa ipan elhuicac TOTECO techtlachilijtoc tlen tiitztoque ipan ni tlaltepactli.

¹⁵Yajaya TOTECO tlen techyolchijchijqui nochi titlaltepac ehuani huan techtlachilía nochi tlen tijchijtinemij.

¹⁶Se hueyi tlanahuatijquetl ax tlatlani pampa quinpiya miyac isoldados. Niyon se soldado tlen motemaca ax tlatlani pampa quipiya miyac fuerza.

¹⁷Amo ximotemachi ipan se cahuayo para mitzmanahuis yonque nelía tetic. San ica ifuerza ax hueli temanahuía.

¹⁸Pero TOTECO, quena, yajaya nochipa techtlachilijtoc tojuanti tlen tiquimacasij tiquixpanose. Techmocuitlahuía tlen timochiyaj ipan iteicnelilis.

¹⁹Techmanahuía quema tiitztoque nechca miquistli. Huan techtlamacas quema oncas mayantli para noja ma tiitztoca.

²⁰Tojuanti ipan toyoltzi timotemachíaj ipan TOTECO. Yajaya techpalehuía huan techmanahuía ica tlen ax cuali.

²¹Yeca ma tiyolpaquica ipan TOTECO, pampa timoneltemachijtoque ipan yajaya tlen nelía tlatzejtzeloltic.