SALMOS 22:4-15

⁴Totatahua mochixque ipan ta. Quena, motemachijque mopan ta huan ta tiquinmanahui.

⁵Mitznojnotzque quema tlaijiyohuiyayaj huan tiquinmaquixti. Mopan ta motemachijque huan ax tiquinpinahualti.

⁶Pero na nimomati queja se pilocuiltzi huan ax queja se tlacatl. Sequin san nechhuetzquilíaj huan sequinoc nechcocolíaj.

⁷Nochi tlen nechitaj san noca paquij, huan tlancuitzihuij huan mocuahuihuixohua,

⁸huan quiijtohuaj: “Yajaya tlen motemachía ipan TOTECO, huajca ma tiquitaca intla quimaquixtis. Intla nelía quiicnelía, ma quimanahuiqui.” Queja nopa quiijtohuaj tlacame.

⁹Pero TOTECO, na nijmati para tinechpalehuijtoc. Tinechquixti iijtico nonana. Tinechmocuitlahuijtoc hasta tlen quema noja nichichiyaya.

¹⁰Huan quema nitlacatqui ya ipa nimotemachijtoc ipan ta. Nochi tonali tieltihualajtoc tinoTeco Dios.

¹¹Amo xinechtlalcahui pampa hualajtoc ni cuesoli huan axaca seyoc tlen huelis nechpalehuis.

¹²Miyac nocualancaitacahua nechyahualojtoque queja torojme tlen mosisiníaj. Quena, nesij queja nopa huejhueyi torojme tlen itztoque ipan tlali Basán.

¹³Nanalcaj queja tecuanime tlen mosisiníaj. Camachalohuaj huan nechmelactlachilíaj.

¹⁴Na nimomati queja atl tlen mopatzcatoc huan campa hueli toyajtoc. Nochi noomiyo san lelecuecatoc. Noyolo eltoc queja cera tlen atiya.

¹⁵Tlantoc nochi nochicahualis. Nijpiya nocamac huactoc queja se chachapal tepalcatl, huan nonenepil tlatzquitoc ica nocamacholec. Tinechtlalijtoc campa tlahuactoc huan campa onca miquistli.