SALMOS 22:19-29

¹⁹Pero ta, TOTECO, amo xinechtlalcahui, pampa na niitztoc momaco. Xihuala nimantzi xinechpalehuiqui.

²⁰Xinechmanahui tlen ininmachete ni mosisinijca tlacame tlen itztoque queja chichime. Amo xiquincahuili ma nechmictica.

²¹Eltoc queja niitztoc inincamaco tecuanime, huajca xinechmaquixti. Nopa tlacame itztoque queja torojme, ma ax nechtompojhuica.

²²Huan na niquinpohuilis noicnihua tlen ta, TOTECO, huan quema oncas tlasentilistli, nimitzhueyichihuas iniixpa nochi tlacame.

²³TOTECO, tojuanti tlen timitztlepanitaj huan tiquimacasij timitzixpanose timitzpaquilismacaj. Nochi tiiteipa ixhuihua Israel, timitzhueyichihuaj. Quena, timitzhueyimatij nochi tiisraelitame.

²⁴Pampa ax titechilcajtoc quema titlaijiyohuíaj, niyon ax titechhuejcamajcajtoc. Ax neli titechixtlatilía. ¡Axtle! Ta tinechtlacaquilía quema timitztlajtlaníaj xitechpalehuiqui.

²⁵Huajca, TOTECO, ipan nopa hueyi tlasentililistli nimitzpaquilismacas iniixtla nochi motlacajhua, pampa ta titemachtli. Iniixtla tlen mitztlepanitaj huan quiimacasij mitzixpanose, na nijchihuas tlen nimitztencahuilijtoc para nijchihuas.

²⁶Huajca nochi tlen teicneltzitzi tlacuase huan ixhuise. Nochi tlen quitemohuaj TOTECO quipantise huan quipaquilismacase. Quena, paquise para nochipa.

²⁷Tlacame ipan nochi tlaltini campa hueli ipan tlaltepactli motepotztocase huan quiilnamiquise TOTECO. Inijuanti pehuase quihueyimatise huan motlancuaquetzase iixpa.

²⁸Pampa TOTECO, yajaya nopa tlanahuatijquetl tlen quinahuatía nochi tlaltini.

²⁹Nochi tlen quipiyaj tomi huan nochi tlen teicneltzitzi ipan ni tlaltepactli motlancuaquetzase iixpa. Quena, nochi tlaltepac ehuani tlen teipa miquise, quihueyimatise.