1 Techtacaquili, TOTECO, pampa nimitznojnotza. Nijchijtoc cati xitahuac, huan amo niistacati. Xijtacaquili cati nimitztajtanía huan techpalehui.
2 Techtajtolsencahua iniixpa nochi masehualme. Xiquinnextili para amo teno nijchijtoc, pampa nochipa tijmati cati xitahuac.
3 Masque tijhualtachilía noyolo ica tayohua huan techyejyecojtoc, amo teno amo cuali tijpantijtoc. Amo niquijtojtoc cati amo monequi,
4 quej quichihuaj ne sequinoc. Na nimoiyocatalijtoc ten iniojhui amo cuajcualme. Nijchijtoc senquisa quej quiijtohua motanahuatil.
5 Nijtoquilijtoc moojhui huan amo nihuetztoc ipan tajtacoli.
6 Nimitznojnotza, noTeco Dios, pampa nijmati technanquilis. Techtacaquili huan techchihuili cuenta.
7 Technextili moteicnelijcayo cati cuajcualtzi. Ta tiquinmaquixtía ica mochicahualis cati motemachiyaj ipan ta.
8 Techmocuitahui quej se quimocuitahuía iixsital. Quej se piyo quintatía ipilconehua ieltapaltzala, nojquiya quej nopa techmocuitahui.
9 Techtati ten nopa amo cuajcualme cati nechyahualojtoque para nechmictise.
10 Nelía mocualnequij huan quema camanaltij, san mohueyimatij.
11 Nechtoquilijtinemij campa ninentinemi huan san quichiyaj nopa talojtzi quema huelise nechtahuisose talchi.
12 Inijuanti itztoque quej tecuanime cati tahuel mayanaj huan quinequij tecuase, huan motatijtoque ostoijtic para quiitzquise se masehuali quema panos.
13 Ximotanana, TOTECO, xiquinnamiquiti. Xiquinchihualti ma motancuaquetzaca moixpa. Ica momacheta, techmanahui ten nopa amo cuajcualme.
14 Ica mochicahualis, TOTECO, techmaquixti inimaco inijuanti cati san quipiyaj cati eltoc ipan ni taltipacti. Tijmiyaquilijtoc cati iniaxca nica. Nojquiya xiquinmaca miyac tatzacuiltili hasta mocahuas para ininconehua.
