SALMOS 17:1-14

¹Techtacaquili, TOTECO, pampa nimitznojnotza. Nijchijtoc cati xitahuac, huan amo niistacati. Xijtacaquili cati nimitztajtanía huan techpalehui.

²Techtajtolsencahua iniixpa nochi masehualme. Xiquinnextili para amo teno nijchijtoc, pampa nochipa tijmati cati xitahuac.

³Masque tijhualtachilía noyolo ica tayohua huan techyejyecojtoc, amo teno amo cuali tijpantijtoc. Amo niquijtojtoc cati amo monequi,

⁴quej quichihuaj ne sequinoc. Na nimoiyocatalijtoc ten iniojhui amo cuajcualme. Nijchijtoc senquisa quej quiijtohua motanahuatil.

⁵Nijtoquilijtoc moojhui huan amo nihuetztoc ipan tajtacoli.

⁶Nimitznojnotza, noTeco Dios, pampa nijmati technanquilis. Techtacaquili huan techchihuili cuenta.

⁷Technextili moteicnelijcayo cati cuajcualtzi. Ta tiquinmaquixtía ica mochicahualis cati motemachiyaj ipan ta.

⁸Techmocuitahui quej se quimocuitahuía iixsital. Quej se piyo quintatía ipilconehua ieltapaltzala, nojquiya quej nopa techmocuitahui.

⁹Techtati ten nopa amo cuajcualme cati nechyahualojtoque para nechmictise.

¹⁰Nelía mocualnequij huan quema camanaltij, san mohueyimatij.

¹¹Nechtoquilijtinemij campa ninentinemi huan san quichiyaj nopa talojtzi quema huelise nechtahuisose talchi.

¹²Inijuanti itztoque quej tecuanime cati tahuel mayanaj huan quinequij tecuase, huan motatijtoque ostoijtic para quiitzquise se masehuali quema panos.

¹³Ximotanana, TOTECO, xiquinnamiquiti. Xiquinchihualti ma motancuaquetzaca moixpa. Ica momacheta, techmanahui ten nopa amo cuajcualme.

¹⁴Ica mochicahualis, TOTECO, techmaquixti inimaco inijuanti cati san quipiyaj cati eltoc ipan ni taltipacti. Tijmiyaquilijtoc cati iniaxca nica. Nojquiya xiquinmaca miyac tatzacuiltili hasta mocahuas para ininconehua.