SALMOS 135:8-21

⁸Quichijqui ma miqui nopa achtohui ejquetl ipan sesen familia tlen tlali Egipto, huan nopa achtohui ejquetl tlen inintlapiyalhua.

⁹Quichijqui huejhueyi chicahualnescayotl ipan tlali Egipto iixtla Faraón huan itlatequipanojcahua.

¹⁰Quintzontlamilti miyac tlacame ipan miyac tlaltini. Quinmicti tlanahuatiani tlen quipiyayayaj miyac chicahualistli.

¹¹Quimicti Sehón tlen eliyaya inintlanahuatijca nopa amorreos. Nojquiya quimicti Og tlanahuatijquetl tlen tlali Basán huan nochi nopa tlanahuatiani ipan tlali Canaán.

¹²Huan nochi nopa tlali tlen quinahuatiyayaj nopa tlanahuatiani quincuili, huan quinmacac nopa tlaltini nopa israelitame queja elisquía se tlamantli tlen inintata quincahuilijtejqui.

¹³TOTECO, tlacame mitzilnamictose para nochipa. Nochi tlacame tlen tlacajtiyase mitzixmajtose para tlahuel tihueyi.

¹⁴Pampa TOTECO quintlajtolsencahuas xitlahuac nochi itlacajhua, huan yajaya quintlasojtlas itlatequipanojcahua.

¹⁵Nopa tlacame tlen itztoque ipan tlaltini tlen ax quiixmatij Toteco, quinhueyichihuaj teteyome tlen oro huan plata tlen quinchijchijtoque ica ininma.

¹⁶Nopa teteyome quipiyaj inincamac, pero ax camatij, quipiyaj iniixtiyol, pero ax tlachiyaj.

¹⁷Quipiyaj ininnacas, pero ax tlacaquij, huan nojquiya ax hueli tlaijiyotilanaj.

¹⁸Nopa tlacame tlen quinchijchihuaj nopa teteyome nelía huihuitique, san se queja nopa teteyome, huan san se huihuitique tlen ininpan motemachíaj.

¹⁹¡Inisraelitame, xijpaquilismacaca, TOTECO! Imojuanti intotajtzitzi tlen iniixhuihua Aarón, xijpaquilismacaca TOTECO.

²⁰Iniixhuihua Leví, xijpaquilismacaca TOTECO. Huan nochi imojuanti tlen inquiimacasij huan inquitlepanitaj TOTECO, xijpaquilismacaca.

²¹Nochi tlacame ipan altepetl Jerusalén ma quipaquilismacaca TOTECO pampa yajaya itztoc nica ipan altepetl Jerusalén. ¡Paquilistli!