72 Nákḻe'eže chawe' da' bchi'lo' neda', ka zante mil mežw oro, na' plat.
73 Ḻen na'kzo' beno' neda' káteze naka'. Bzejní'il neda' nich wsedla' gona' da' wnnakzo' Le'.
74 Benne' ka' ẕžébegake' Le' ḻé'egekle' neda', na' yebégekle' dan' žx̱en ḻaža'a gak kan ẕnna x̱tižo'o.
75 X̱ana' Dios, nnezla' nak chawe' kan ẕchi'a ḻažo'o, na' ḻo yeḻa' ḻi ḻaže' chio' bsaka' zi'o neda'.
76 Na'a ḻo yeḻa' žeyache' ḻaže' chio' beyón ẕen neda' káteze nak da' bchebe ḻažo'o gono' chia' neda', wen žin chio'.
