38 Kabay ani, Dwata, too sasè i kalbutam di to mgalékam harì; taknangam kenen na taknagolam.
39 I kiboam saligam gambet landè fakangam di kenen; salngad ku tagbatam i kyangenan di kfung.
40 Tafalbaam labat i syudadan, na tafalmom i dad guflidungan mdà di dad mngayu.
41 Balù simto to magu mlius di banwen tmaku i dad knunan, na nadoy kenen i dademen saldan.
42 Tafatum i dad to dmuen kenen, na taflehewam ale.
43 Talaam nimò gban i dad tekan, du laam kenen tnabeng di kasfati.
44 I bong kdatahan na kafyen tanweam di kenen; na tanweam i glalan.
