1 Apo, daydayawek sik-a, tan sin kateyak yan inmisalakan ka. Adim inpalobos ay din kalaban et lomaslasoy da.
2 Nankedawak si badang mo yan inmagas ka, Yahweh ay Diyos ko.
3 Dandani ay mapospos din leng-ag ko, ngem inmisalakan ka sin pese, Apo.
4 Mankanta koma din napodno ay ipogaw mo, idaydayaw da koma din nasantoan ay ngadan mo.
5 Tan sinkaattikan yan mamaga din bonget mo, ngem engganas tongpal biyag din seg-ang mo. Olay mo maninsinlabiak ay man-oga, ngem manragsakak sin kaagsapaana.
6 Sin timpo ay mayat din biyag ko, kinwanik sin nemnem ko, “Maga polos di problima ay domteng sin biyag ko.”
7 Gapo sin seg-ang mo, kamanak dakdake ay dontog ay insaad mo. Ngem idi binmaybay-an ka, Apo, palalo di egyat ko.
8 Nan-adawagak en sik-a, Apo, et kinwanik sin kararag ko,
9 “Sino pay di magon-od mo, mo mateyak et sin kad-an di natey di emeyak? Ay din natey yan dayawen daka ya dad-aten da ay matalek ka?
10 Dengngem koma din kararag ko, maseg-ang ka ta bomadang ka, Apo.”
11 Et siya na di inyat mo, nanbalinem si ragsak din ladingit ko, isonga kinaan ko din inbabadok ay sako yan nay mansalsalaak begew sin ragsak ay indawat mo.
